– કાંકરીયા વિશે તો જાણ્યું, હવે વારો છે કાંકરીયાને નિહાળવાનો… તો ચાલો… અને જુઓ કાંકરીયા.. મારી નજરે..

– સૌથી પહેલા પેશ છે (એટલે કે અહી રજુ થાય છે)…

કાંકરીયામાં પ્રવેશ લેવાનો આ તોતિંગ દરવાજો…!

~ ઉંચાઇ લગભગ ૨૫-૩૦ ફુટ !!! (પ્રવેશ માટે આ પ્રકારના બીજા દરવાજા પણ છે.) સિક્યુરીટી ચેક-અપ દરેક માટે ફરજીયાત છે.

~ દરવાજો ભલે તોતિંગ હોય પણ તે શોભા માટે જ છે! (હા એકલી શોભા જ અંદર જશે. 😀 #મજાક) કેમ કે, કાંકરીયામાં આવતા મુલાકાતીઓ માટે ત્યાં જ બાજુમાં નાનકડો દરવાજો છે; ત્યાંથી પ્રવેશ અપાય છે.

કાંકરીયા તળાવની આસપાસની હરિયાળી અને ફુટપાથ..

~ સવાર-સાંજ દોડવા (અને ચાલવા) આવતા લોકો માટેનો ટ્રેક ઉપરાંત આંખો ને ઠારે અને મનને ગમે તેવી સ્વચ્છતા..!!!¹

આ જુઓ.. કાંકરીયામાં ફરવાનો આનંદ માણતી બચ્ચા પાર્ટી…

મજ્જા આવે એવી નૌકા વિહાર (એટલે કે, બોટીંગ) ની સુવિધા પણ છે!!

હવે… બોટીંગની મજ્જા કરવાની કિંમત પણ જાણી લો….

છે ને એકદમ સસ્તુ!!!
(મોંઘુ લાગે છે? તો છોડી દો યાર…નૌકા વિહાર ફરજીયાત નથી..!! 😀 )

..તો આગળ વધીએ,

~ આ છે કાંકરીયા તળાવની ફરતે સહેલ કરાવતી ‘અટલ એક્ષપ્રેસ’, મારી જાણકારી મુજબ આ ખાસ ટ્રેનને કાંકરીયા માટે વિદેશથી આયાત કરવામાં આવી હતી. આ સાંભળીને એકવાર તે વિદેશી ટ્રેનમાં બેસવાની ઇચ્છા થઇ આવીને…. હવે તે માટે સ્ટેશન સુધી તો જવુ પડે ને મારા દોસ્ત…

~ તો…હવે આપ પહોંચી ગયા છો “અટલ એક્ષપ્રેસ સ્ટેશન” સુધી. (ટ્રેનમાં સફર કરવા માટે ૧૦ રૂ। ની ટિકીટ લેવી પડે છે, ખુદાબક્ષ મુસાફરને બક્ષવામાં નહી આવે જેની ખાસ નોંધ લેશો.)

ટ્રેન સ્ટેશન પર સમયસર (!!) આવી ચુકી છે.
ચાલો, બધા વહેલા તે પહેલાના ધોરણે ગોઠવાઇ જાઓ…

~ આગળનો ફોટો જરા ધ્યાનથી જુઓ… કાંકરીયા તળાવની મધ્યમાં આવેલ આ સુંદર જગ્યા ને નગીના વાડી તરીકે ઓળખવામાં આવે છે..

~ માફ કરજો દોસ્તો, મારી પાસે ત્યારે વધુ સમય ન હોવાથી અંદર સુધી પહોંચવુ શકય ન હતું. પણ આપ જયારે કાંકરીયાની મુલાકાત લો ત્યારે તળાવની શાન ગણાતી આ જગ્યાની મુલાકાત ચુકતા નહી…

~ અહી આપ નીહાળી શકો છો સંગીતમય (મ્યુઝિકલ) નાચતા ફુવારાં અને સાથે-સાથે દિલ ખુશ કરી દે તેવો જોરદાર લેઝર શો, તથા આજુબાજુ ફેલાયેલી રમણીય હરિયાળી!

~ કાંકરીયા તળાવની આસપાસ આવેલા અન્ય આકર્ષણ પણ જોવાલાયક છે; જેમ કે..

કમલા નહેરુ ઝુઓલોજીકલ ગાર્ડન..

(કોઇ જગ્યાએ આ નહેરુ-ગાંધીનું નામ ન મળે તો નવાઇ લાગે!)

~ ચાચા નહેરુ બાલવાટીકા..

~ ઉપરાંત પ્રાણીસંગ્રહાલય, કિડઝ સીટી, વિવિધ રાઇડસ,.. વગેરે વગેરે..

~ કાંકરીયા એક ઐતિહાસિક મહત્વ પણ ધરાવે છે …પણ તેની વાતો પછી ક્યારેક કરીશું.

~ જુઓ, ફરવા માટે તો ઘણું બધુ છે પણ થાક ના લાગે તો જ. એટલે અહી આવેલ મંદીરમાં બે ઘડી બેસીને ભગવાનને પ્રાર્થના કરતા જજો કે થોડી ફરવાની અને ઘણું માણવાની શક્તિ આપે..

~ આપણાં ભુતપુર્વ વડાપ્રધાન શ્રી લાલબહાદુર શાસ્ત્રી પણ અહી બિરાજમાન છે, તો એક નજર તેમની તરફ પણ કરશો..

~ શારીરિક થાક માટે તો ભગવાનને પ્રાર્થના કરીને શક્તિ મેળવી પણ આટલુ બધુ ફરીને ભુખ તો જબરદસ્ત લાગી જ હશે! એટલે જ..સરકારે આપનો ખયાલ રાખીને આપનો આગળનો પડાવ કયાં હશે તે વિચારી રાખ્યું છે…

~ જીભને ગમે તેવો સ્વાદિષ્ટ નાસ્તો અહિ ઉપલબ્ધ છે. અતિભુખ્યા જન અહી સંપુર્ણ ભોજન પણ માણી શકે છે. આઇસક્રીમ, જ્યુસ, ઢોંસા, વડાપાઉ, સેન્ડવિચ, પાઉભાજી, પીઝા, ભેળ વગેરે વગેરે.. જે હાજર હશે તે મળશે. 🙂

કેટલીક અન્ય ક્લીક્સ..

~ આ તો તમે માણી દિવસની મુસાફરી..

~ જયારે આ જગ્યાની મુલાકાત લેવાનો મુળ લ્હાવો તો સાંજ ના સમયે આવે.. અદભુત લાઇટીંગ,  ઠંડુ વાતાવરણ, સ્વચ્છ હવા તથા સંગીતમય બેકગ્રાઉન્ડ આપને દિવસભરનો થાક ભુલાવી દેશે તેની ચોક્કસ ખાતરી.

~ આશા રાખુ છું કે આપને મારી સાથે કાંકરીયા ફરવામાં આનંદ આવ્યો હશે. જો ખરેખર આનંદ આવ્યો જ હોય તો કયારેય આ વર્ચુઅલ મુલાકાતને રૂબરૂ મુલાકાતમાં ગોઠવજો; આપને અનેક ઘણો વધારે આનંદ આવશે.

~ આમ જ મળતા રહીશું…

~ આવજો દોસ્તો.