કેટેગરી ભજન

આપણી ભાષામાં રચાયેલા સુંદર ભજન આ વિભાગમાં જોઇ શકાશે.

લગભગ જ્યાં રચનાકારની જાણ છે ત્યાં તેમના નામ ચોક્કસ લખવાનું ધ્યાન રાખ્યું છે છતાંયે કોઇ જગ્યાએ ચુકી જવાયું હોય તો વાચક ધ્યાન દોરી શકે છે.

એક વાત એ પણ છે કે મોટાભાગે અહી ઉમેરાયેલાં ભજન લોકગીતની જેમ સચવાયેલાં છે એટલે તેમના મુળ રચયિતા શોધવા શક્ય નથી.

હરિને ભજતાં હજી કોઇની લાજ જતાં નથી જાણી રે

હરિને ભજતાં હજી કોઇની લાજ જતાં નથી જાણી રે,
જેની સુરતા શામળિયા સાથ, વદે વેદવાણી રે..
હરિને ભજતાં…

વહાલે ઊગાર્યો પ્રહલાદ, હરણાકંસ માર્યો રે,
વિભીષણને આપ્યું રાજ્ય, રાવણ સંહાર્યો રે..
હરિને ભજતાં હજી કોઇની લાજ જતાં નથી જાણી રે..

વહાલે નરસિંહ મહેતાને હાર, હાથોહાથ આપ્યો રે,
ધ્રુવને આપ્યું અવિચલ રાજ, પોતાનો કરી સ્થાપ્યો રે..
હરિને ભજતાં હજી કોઇની લાજ જતાં નથી જાણી રે…

વહાલે મીરાં તે બાઇનાં ઝેર હળાહળ પીધાં રે,
પાંચાલીનાં પૂર્યા ચીર, પાંડવ કામ કીધાં રે..
હરિને ભજતાં હજી કોઇની લાજ જતાં નથી જાણી રે..

આવો હરિ ભજવાનો લ્હાવો, ભજન કોઇ કરશે રે,
કર જોડી કહે પ્રેમળદાસ, ભક્તોનાં દુઃખ હરશે રે..
હરિને ભજતાં હજી કોઇની લાજ જતાં નથી જાણી રે..

~ પ્રેમળદાસ