કેટેગરી ભજન

આપણી ભાષામાં રચાયેલા સુંદર ભજન આ વિભાગમાં જોઇ શકાશે.

લગભગ જ્યાં રચનાકારની જાણ છે ત્યાં તેમના નામ ચોક્કસ લખવાનું ધ્યાન રાખ્યું છે છતાંયે કોઇ જગ્યાએ ચુકી જવાયું હોય તો વાચક ધ્યાન દોરી શકે છે.

એક વાત એ પણ છે કે મોટાભાગે અહી ઉમેરાયેલાં ભજન લોકગીતની જેમ સચવાયેલાં છે એટલે તેમના મુળ રચયિતા શોધવા શક્ય નથી.

તારે રહેવું ભાડાના મકાનમાં

જીવ શાને ફરે છે ગુમાનમાં
તારે રહેવું ભાડાના મકાનમાં..

તને મળીયું મકાન કર્યા રંગ રોગાન
જાણે કાયમનું લીધું વેચાણમાં
તારે રહેવું ભાડાના મકાનમાં..

કરે એવો રુવાબ જાણે મોટો નવાબ
કાળ આવી કહેશે તારા કાનમાં
તારે રહેવું ભાડાના મકાનમાં..

થાશે હુકમનામું નહિ ચાલે કોઈ બહાનું
તારું ડહાપણ નહિ આવે કામમાં
તારે રહેવું ભાડાના મકાનમાં..

માટે ચેતીને ચાલો કરો હરિને વહાલો
તને સંતો સમજાવે સાનમાં
તારે રહેવું ભાડાના મકાનમાં..