જૂનું તો થયું રે, દેવળ જૂનું તો થયું;
મારો હંસલો નાનો ને, દેવળ જૂનું તો થયું…
આ રે કાયા રે હંસા, ડોલવાને લાગી રે;
પડી ગયા દાંત, માંયલી રેખું તો રહી,
મારો હંસલો નાનો ને, દેવળ જૂનું તો થયું…
તારે ને મારે હંસા, પ્રિત્યું બંધાણી રે;
ઊડી ગયો હંસ, પિંજર પડી રે રહ્યું,
મારો હંસલો નાનો ને, દેવળ જૂનું તો થયું…
બાઈ મીરાં કે પ્રભુ ગિરિધરના ગુણ;
પ્રેમનો પ્યાલો તમને પાઉં ને પીઉં,
મારો હંસલો નાનો ને, દેવળ જૂનું તો થયું…
~ મીરાંબાઇ