નૈયા ઝૂકાવી મેં તો જોજે ડૂબી જાય ના,
ઝાંખો ઝાંખો દીવો મારો જોજે રે બુઝાય ના…
સ્વાર્થનું સંગીત ચારે કોર બાજે,
કોઈ નથી કોઈનું આ જગમાં આજે..
તનનો તંબુરો જોજે બેસુરો થાય ના…
ઝાંખો ઝાંખો દીવો મારો જોજે રે બુઝાય ના…
પાપ ને પુણ્યના ભેદ રે ભૂલાતા,
રાગ ને દ્વેષ આજે ઘરઘર ઘુંટાતા,
જોજે આ જીવતરમાં ઝેર પ્રસરાય ના..
ઝાંખો ઝાંખો દીવો મારો જોજે રે બુઝાય ના…
શ્રદ્ધાના દીવડાને જલતો જ રાખજે,
નિશદીન સ્નેહ કેરુ તેલ તેમાં પૂરજે,
મનના મંદિરને જોજે અંધારું થાય ના..
ઝાંખો ઝાંખો દીવો મારો જોજે રે બુઝાય ના…
