ગુજરાતી થઇ, ગુજરાતી કોઇ, બોલે નહીં બરાબર..

ગુજરાતી થઇ, ગુજરાતી કોઇ, બોલે નહીં બરાબર,
ભાષાની મીઠાશ નહીં, જાણે બોલે કાગડો, કાબર..

ઉત્તરમાં પાટણની પ્રભુતા, અંબાજી સાક્ષાત,
અને દક્ષિણમાં આદીવાસીઓ ભાષાથી અજ્ઞાત..
અને અમદાવાદમાં ચીપી ચીપીને..
“પવાલામાં પાણી પીશો…??”
અમદાવાદમાં ચીપી ચીપીને બોલે બ્રામણ નાગર
ગુજરાતી થઇ, ગુજરાતી કોઇ, બોલે નહીં બરાબર..

નર્મદનું સુરત જુઓ….
નર્મદનું હુરત જુઓ, તો બોલે બોલે બોબડું…
તું ને બદલે ટટ્ટુનો ટું, જ્યારે બોલે ત્યારે તોતડું..
તપેલી ને એ કહે પતેલી!!!
“મારી લાયખા… બટાકાનું હાક..!!”
તપેલી ને એ કહે પતેલી , પછી હોય શેઠ કે ચાકર..
ગુજરાતી થઇ, ગુજરાતી કોઇ, બોલે નહીં બરાબર…

એ અચોં અચોં કંઇ કચ્છી બોલે ને,
કાઠિયાવાડી ઓલા હાલો.. જી રે.. એ હાલો બાપા..
કે ચરોતરીમોં કેમ છો, ચ્યમ છો ને ગરબડને ગોટાળો, હેંડો લ્યા..
કે ચરોતરીમોં કેમ છો, ચ્યમ છો, ગરબડને ગોટાળો,
કે સૌએ મળીને ભ્રષ્ટ કર્યો આ ભાષાનો રત્નાકર..
ગુજરાતી થઇ, ગુજરાતી કોઇ, બોલે નહીં બરાબર..
બોલે નહીં બરાબર.. બોલે નહીં બરાબર….

~ અવિનાશ વ્યાસ