[170819] ફોટો અપડેટ : ગ્રીન ડે અને જન્માષ્ઠમી ડ્રેસીંગ

~ લગભગ એક વર્ષ પહેલા છેલ્લી ફોટો અપડેટ હતી. આજે ઘણાં દિવસે યાદ આવ્યું કે બીજું લખવાનો સમય ન હોય તો એકાદ ફોટો અપડેટ કરી દેવાય. (એમાં કાંઇ કોઇ ખોટું ન લગાડે.)

~ ઉપર હેડીંગમાં લખ્યું છે એમ આજે સામાન્ય ફોટો અપડેટ નથી. સ્કુલમાં કરાવવામાં આવતી એક્ટીવીટીઝ અને તેની પાછળ મેડમજીની મહેનતની નોંધ લેવા માટે આજની અપડેટ્સમાં ખાસ ફોટો ઉમેરવામાં આવ્યા છે. (આ બહાને મેડમજી પણ ખુશ થશે.)

~ આજે માત્ર વ્રજની ફોટો અપડેટ છે. નાયરા અભી બાકી હૈ મેરે દોસ્ત…. (નાની છે એટલે તેને ભુલી ગયા છીએ એમ ન સમજવું; તેના માટે પણ એક અલગ પોસ્ટ બનાવવામાં આવશે.)

# ગ્રીન ડે..

~ વ્રજને દ્રાક્ષનો ઝુમખો બનાવ્યો હતો. (અથવા તો તેને ઝુમખો જ બનાવ્યો છે એવું તેની મમ્મીનું માનવું છે. કેટલીક બાબતોમાં અમે ખોટી તકરાર કરતા નથી.)

# જન્માષ્ઠમી ડ્રેસીંગ

~ વ્રજને સ્કુલના કોઇ કાર્યક્રમમાં રાધા સાથે ડાન્સ કરવા માટે સ્પેશીયલી સિલેક્ટ કરવામાં આવ્યો હતો અને સાથે-સાથે ડ્રેસીંગ કોમ્પીટીશન પણ ખરું! અરે હા, આ દિવસે અમારા આ કનૈયાનો જન્મદિવસ પણ હતો. (આ ડ્રેસ પહેરવા વ્રજ રેડી થયો એ જ અમારા માટે મોટી વાત હતી.)

~ કહેવાની જરૂર તો નથી લાગતી છતાંયે મારી નોંધ માટે ઉમેરું છું કે વ્રજ બંને ડ્રેસીંગમાં ફર્સ્ટ આવ્યો છે!

JUN'17 – અપડેટ્સ

~ ઘણાં સમય પછી અપડેટ્સની નોંધ થશે એવું જણાય છે. (પોસ્ટ ન ઉમેરી હોય તો એવું જણાય ને! એમાં કોઇ નવાઇ નથી.)

~ નવા ઉગેલા ફુલના ચક્કરમાં બગીચાનો માળી તેના આખા બગીચાનું કાયમી કામ ભુલી ગયો હોય એવી સ્થિતિ છે. (એક રીતે જોઇએ તો એ નવા ફુલની વાતો પણ મારા બગીચાની અપડેટ્સ જ છે ને..)

~ ઓકે તો લેટેસ્ટ અપડેટ્સમાં તો એવું છે કે વ્રજ, નાયરા અને મેડમજી વેકેશન પુરું કરીને ઘરે આવી ગયા છે અને ગઇ કાલથી વ્રજની સ્કુલ શરૂ પણ થઇ ચુકી છે. મને એમ હતું કે વ્રજ આટલા લાંબા વેકેશન પછી ફરી સ્કુલ જવામાં એક-બે દિવસ આનાકાની કરશે પણ તે આ બાબતે જરાયે મારા જેવો નથી. (બોલો, ખુશીથી સ્કુલ જવા તૈયાર થઇ ગયો મારો દિકરો! ગુડ બોય.)

~ ‘બગીચાના ફુલો ફરી ફુલદાનીમાં ગોઠવાઇ જશે’ -આ વાળી વાત અત્યાર સુધી ૭૫૦+ લોકો પોસ્ટ કરી ચુક્યા છે અને આ વૉટ્સએપ ફોરવર્ડીયાઓના તો મોબાઇલ છીનવી લેવા જેવા છે! 😜 આવી પોસ્ટ લખનાર/ફોરવર્ડ કરનાર ભાઇ(કે બહેન)ને એમ હશે કે તે પહેલી વાર કહી રહ્યા છે! પણ તેમની આવી ધારણા સિવાય બીજું કંઇ જ નવું નથી હોતું… (તે માસુમ ઇન્સાન જે ભલું-બુરું જણાવવા ઇચ્છતા હોય છે તે બધું જ આ સંસારમાં અગાઉ કહેવાઇ ચુક્યું હોય છે!)

~ આજકાલ સમગ્ર ગુજરાતની સ્કુલોમાં ફી વિશે જબરી અસમંજસતા ચાલી રહી છે. વ્રજની સ્કુલના કેટલાક વાલીઓએ મને તેમની લડતમાં જોડાવવા અને સરકારી નિયમોના આધારે વધારે ફી ની વિરુધ્ધમાં લડવા આગ્રહ કર્યો છે; પણ ખબર નહી કેમ મને આ લડતમાં તર્ક નથી દેખાતો.

~ શિક્ષણનો ખર્ચ હવે ખરેખર ઘણો વધી ગયો છે તે આપણે સૌ જાણીયે છીએ અને તેની પર સરકારી અંકુશ હોય તો ઉત્તમ છે; પણ દરેક સ્કુલ માટે એક જ નિયમે ફી નક્કી ન કરી શકાય તે સ્વીકારવું પડશે. (અત્યારે તો મામલો હાઇકોર્ટમાં છે પણ મને લાગે છે કે છેલ્લે આમાં ભીનું સંકેલાઇ જશે. રાજકારણીઓની જ ઘણી સ્કુલો છે એટલે ચુટણી સુધી કેસ ખેંચાશે અને પછી.. જૈસે થે!)

~ વ્રજની સ્કુલમાં તો દરેક સ્ટુડન્ટ માટે એડવાન્સ ચેક લઇ લીધા છે અને એક ચેક તો ક્લીઅર પણ થઇ ગયો છે! બીજા ચેક તેઓ ગવર્નમેન્ટ પોલીસી નક્કી થયા બાદ જ તેમના એકાઉન્ટમાં ભરશે એવું સ્કુલના વ્યવસ્થાપકોનું કહેવું છે. (જો કે કેટલાક અવિશ્વાસુ વાલીઓએ સ્ટોપ-પેમેન્ટનો વિકલ્પ પસંદ કરેલો છે.)

~ ધંધાની એક નવી જગ્યાને સજાવવામાં હમણાં વ્યસ્ત છું અને નિયમિતતા ને છંછેડીને થોડો અસ્તવ્યસ્ત પણ છું. જોઇએ કે આ નવી અસ્તવ્યસ્તતા મને ક્યાં સુધી લઇ જાય છે. દિમાગને હમણાં ફુલ્લી દિલથી ચલાવું છું. (મરકટ મનનું કંઇ નક્કી ન કહેવાય. કભી ઇસ ઔર તો કભી ઉસ ઔર..)

~ દેશ-દુનિયાની વધારાની ચિંતાને મનમાંથી કાઢવા માટે રાત્રે એક જ વાર ન્યુઝ ચેનલમાં હેડલાઇન્સ સિવાય વધુ ન્યુઝ ન દેખવાનો નિયમ ઉત્તમ સાબિત થઇ રહ્યો છે. આજકાલની અપડેટ્સમાં રાજકારણ વિશે ઘણી ઓછી વાતો નોંધ થતી હોવાનું મુખ્ય કારણ આ નિયમ છે. (હા પણ પેલા એન.ડી.ટી.વી. ના પ્રણવ રોય સાથે જે થયું તે હજુ ઘણું ઓછું છે. યે દિલ માંગે મોર..)

~ વરસાદ આવવાની તૈયારી જણાય છે હવે. અત્યાર સુધી એક વાર મસ્ત કરાં અને બે વાર હળવા ઝાપટાં આવ્યા છે. લેકીન મેઇન સિઝન અભી બાકી હૈ મેરે દોસ્ત.. (આ આપણી ફેવરીટ સિઝન હોં કે! 🙂 )

# નોંધ લાયક: કાલે જ કોઇ સાથે ચર્ચા કરતાં યાદ આવ્યું કે હું લગભગ 3.5 વર્ષથી બિમાર નથી થયો! (ટચ વુડ!.. 😇 )

મથાળું ચિત્રઃ રિવરફ્રંટ રોડ, સાબરમતીના કિનારે, અમદાવાદ
છબીને કંડારનારઃ એ જ.. અમે પોતે. 🙂

[170502] વ્રજ અપડેટ્સ

~ ધાર્યા મુજબ રિઝલ્ટ A+ આવ્યું છે અને વ્રજની સ્કુલ ટુંકા વેકેશન પછી ફરીથી શરૂ પણ થઇ ગઇ છે. હવે નર્સરીમાંથી જુનીયર કે.જી. ના ક્લાસ તરફ પ્રગતિ કરી છે.

~ નર્સરીની પરિક્ષાઓ પછી તેને એક અઠવાડીયાનું વેકેશન મળ્યું’તું. લગભગ ૬ મે પછી મોટું વેકેશન શરૂ થશે. એપ્રિલ-મે મહિનાની અમદાવાદી ગરમી આમ તો આવા કુમળા બાળકો માટે સારી ન કહેવાય તો પણ સ્કુલવાળા ધ્યાન રાખે છે એટલે વાંધો આવે એમ નથી લાગતો. (ટોરેન્ટના લાઇન ફોલ્ટના કારણે માત્ર એક દિવસ વ્રજના ક્લાસમાં એ.સી. બંધ રહ્યું તેની ફરિયાદ ક્લાસના દરેક બાળકોએ મા-બાપને કરી. આ છોકરાઓ એમ ચલાવી લે એવા પણ નથી. 🙂 )

~ CBSE પધ્ધતિ પ્રમાણે ચાલતી સ્કુલના આ લાભ/ગેરલાભ વિશે અમે પહેલાથી માહિતગાર તો હતા જ. છતાંયે મનમાં સવાલ ઉદ્ભવે છે કે સ્કુલીંગના ચક્કરમાં અમે તેને વધારે દબાણ તો નથી કરી રહ્યા ને…? (તે ફરિયાદ નથી કરતો તેનો મતલબ એ પણ નથી કે અમે તેની સાથે કંઇ પણ કરી શકીએ.)

~ વેકેશનના કારણે આસપાસમાં ક્યારેક વધારે ટીમ ભેગી થઇ જાય ત્યારે સ્કુલ જવાનો મુડ ન થાય તે દરેક બાળક માટે સ્વાભાવિક છે એટલે તેને સ્કુલ માટે વધારે ન કહેવું તેવો ઘરમાં મારો આદેશ છે. એકવાર સ્કુલે ન જવાનું કહ્યા પછી પણ જાતે જ જવા માટે તૈયાર થઇ જાય છે એટલે હજુ સુધી આ મુદ્દે કોઇ તકરાર થઇ નથી. (એમ તો ઘણો સમજદાર છે મારો દિકરો.)

~ હમણાં તો તેનું ધ્યાન તેની નાની બહેન પર વધારે છે એટલે બહારના દોસ્તારો સાથે નહિવત સંબંધ છે. તેને પોતાની બહેન હોવાનું અને તે બેબી હવે ઘરમાં હંમેશા તેની સાથે રહેશે તેની ઘણી ખુશી છે. (વ્રજ માટે તેનું નામ છોટી બેબી છે.)

~ આજની વાતને વ્રજ પુરતી મર્યાદિત રાખવાની છે એટલે બેબી વિશેની વધારે વાતો નવી પોસ્ટમાં કરવામાં આવશે. (વ્રજની જેમ તેની અપડેટ્સ પણ શરૂ કરવાનો વિચાર છે.)

~ છેલ્લે, વ્રજના નર્સરી ક્લાસના સ્ટુડન્ટ્સનો ગ્રુપ ફોટો તેના રિઝલ્ટ સાથે આપવામાં આવ્યો છે. (સ્કુલની આ વાર્ષિક ગ્રુપ-ફોટોની સિસ્ટમ ગમી.)

# ફોટો જાણકારીઃ

વ્રજ વચ્ચેની લાઇનમાં ડાબી બાજુથી બીજા નંબર પર બેઠો છે.
તેની પાછળ જે તંદુરસ્ત મહિલા ઉભી છે તે તેની સ્કુલ પ્રિન્સીપલ છે અને જમણી તરફ કુપોષણના ઉદાહરણ જેવી મહિલા તેની ક્લાસ ટીચર છે. (તંદુરસ્તી અને કુપોષણ જેવા શબ્દો ને જરૂર ન હોવા છતાં ઉમેરવામાં આવેલ છે. શારીરિક સ્થિતિ એ વ્યક્તિની અંગત બાબત હોય અને તે વિશે જાહેર ટિપ્પણી ન કરવી જોઇએ એવું અમે હજુ શીખ્યા નથી.)
યાદગીરી તરીકે બીજા દરેક ક્લાસમેટના નામ વ્રજને પુછીને ફોટો પાછળ ક્રમ અનુસાર લખી લીધા છે. (મને વ્રજની યાદશક્તિ પર પણ એટલો જ ભરોસો છે જેટલો મારી યાદશક્તિ પર છે.)