છેલ્લા સમય દરમ્યાનના થોડા રાજકીય, કેટલાક પ્રાદેશિક, બે-ત્રણ અંગત અને એકાદ પ્રાસંગીક અપડેટ્સ…
– મોદીના જાપાન પ્રવાસ દરમ્યાન ગુજરાતના માર્કેટીંગના ન્યુઝ જોઇને દરેક ગુજરાતીને પોતાના પ્રદેશમાં તેમના જેવા મુખ્યમંત્રી હોવા અંગે ગર્વની લાગણી થાય તે સ્વાભાવિક છે. (મોદીનો વિરોધ હોઇ શકે પણ તેમના આ કાર્યનો જેને ગર્વ ન થાય તે ગુજરાતી નહી હોય. વધુ ખાતરી કરવા DNA ટેસ્ટ કરાવી લેવો. 😁 )
– કેશુબાપા છેવટે GPP (ગુજરાત પરિવર્તન પાર્ટી) નામનું કોઇ નવું ગતકડું લાવ્યા છે અને મજપા પણ તેમાં વિલિન થઇ રહી છે ત્યારે ગુજરાતના રાજકીય સમીકરણમાં થોડોઘણો બદલાવ આવશે જ. (કેશુબાપા સારી રીતે જાણે છે કે આ વખતે જો છેલ્લી ઘડીયે ઠંડા પડયા તો તેમની આસપાસના લોકો જ તેમને નહી છોડે; એટલે તો બાપા પણ એડી-ચોટીનું જોર લગાવી રહ્યા છે.)
– જી.પી.પી. કે કોંગ્રેસની ચુટણી જાહેરાતો (‘ઘરનું ઘર’ વાળી) અંગે મોદીસાહેબ હજુ શાંત જણાય છે. જો કે આ તોફાન પહેલાની શાંતિ હોય એવુ પણ હોઇ શકે છે. (નરેન્દ્ર મોદીને દરેક વખતે કોઇને કોઇ મુદ્દા કે વ્યક્તિ સ્વરૂપે તારણહાર મળી જ જાય છે, પણ આ વખતનું ઇલેક્શન અટકળ વગરનું રહેશે એમ લાગે છે.)
– અણ્ણાજી નવો દાવ લઇને આવ્યા છે અને સરકારમાં સક્રિય ભુમિકા માટે ચુટણી લડવાની જાહેરાત કરી છે. (હું અંગત રીતે આ જાહેરાતને ટેકો આપુ છું; કેમ કે સરકાર વિરુધ્ધ આંદોલન કરવા કરતાં તેમાં સક્રિય ભાગ લેવો વધુ હકારાત્મક બની શકે છે.) અને સોનિયાજી-મનમોહનજીની તો વાત જ કરવા જેવી નથી… જવા દો એમને..
– બે દિવસથી વરસાદી માહોલ બન્યો છે અને વાતાવરણ પણ મસ્ત ઠંડુ થઇ ગયું છે. (સરદાર સરોવર ડેમના પાણીથી છલકાતા ફોટો જોઇને દિલ ગાર્ડન-ગાર્ડન થઇ ગયું.)
– મારા વિસ્તારમાં બી.આર.ટી.એસનો ટ્રેક બનાવનાર કંપનીના કાર્મચારીઓ તેમનું કામ અધુરુ મુકીને ગાયબ છે, એટલે વરસાદમાં સમસ્યાઓ વધશે. (હવે વરસાદ માટે પણ આ તકલીફ સહન કરવા લગભગ દરેક નાગરીક તૈયાર થશે. આવ રે વરસાદ..)
# અગાઉના થોડા દિવસોમાં જ ઇન્દીરા બ્રીજના બંને છેડે લગભગ દસેક અકસ્માત થયા છે. (તેમાં એક સરકારી જીપનો પણ સમાવેશ થાય છે) અને દરેકનું કારણ સરખું લાગે છે. ચાલકનું બેધ્યાનપણું નિઃશંક મુખ્ય કારણ ગણી શકાય પરંતુ આ બેધ્યાનપણાની પાછળ તે સ્થળ પણ જવાબદાર છે;
સવાલ થશે કે, એ કઇ રીતે?
પુલ પર ક્યાંય ડિવાઇડર ન હોવુ અને પુલ પુરો થતા જ ડિવાઇડરનું શરૂ થવું.
તે દરેક અકસ્માત રોકી શકાય એમ હતા અને ભવિષ્યમાં પણ રોકી શકાય એમ છે. તે રોડ પર કાયમી પસાર થતા વાહનચાલકોને આ ધ્યાનમાં આવ્યું જ હશે. અને ત્યાં ફરજ પર હાજર ટ્રાફિક પોલિસને નેક ઇરાદા સાથે મારો ઉકેલ અગાઉ બે વખત આપી ચુક્યો છું પણ તેમને તો ચલણ ફાડવા સિવાય બીજો કોઇ મતલબ હોય તેમ જણાતુ નથી.
તો, ઉકેલ એ છે કે..
પુલના બન્ને છેડે આવેલા ડિવાઇડરને એકબીજા સાથે જોડી દેવા. મતલબ કે પુલ ઉપર અવર-જવરના રસ્તા વચ્ચે કાયમી કે ટેમ્પરરી ડિવાઇડર બનાવી દેવું. (આ બનાવ્યા પછી તે જગ્યાએ આ પ્રકારના કોઇ જ અકસ્માત નહી થાય તેની હું ગેરંટી આપુ છું યાર…)
દરેક વખતે બન્ને પક્ષ1ને નુકશાન જ થાય છે અને પછી તેને રીપેર કરવા માટે ખર્ચ પણ કરાય છે; તો આ વારંવારના ખર્ચ અને નુકશાનને કાયમી ઉકેલથી અટકાવી શકાય એમ છે તો તે અંગે વિચારવું તો જોઇએ ને.. (આ વાંચનાર કોઇ મારી વાત આગળ સુધી પહોંચાડે તો ઘણાં લોકોની મદદ થશે. 🙏)
– કાલના વરસાદની અને એ.સી.ની ઠંડકની અસર આજે તબિયત પર થઇ છે. આજે ડૉક્ટરનો ચહેરો જોવા જવું જ પડશે એવું લાગે છે. (શરદીનું જોર વધારે છે અને એક કાનમાં દુખાવો થાય છે.)
– બે મહીના પહેલા નોકરી પર રાખવામાં આવેલા સેલ્સમેનને બીજી જગ્યાએ વધુ સારી તક દેખાતા તે ભાઇ મને છોડીને જઇ રહ્યો છે. (તેનો ઇશ્વર તેને મારાથી વધુ સારો બોસ આપે એવી આશા) હવે ફરી એક નવા ઉમેદવારની શોધ આદરવી પડશે.
– કાલે જન્માષ્ટમી છે અને મેં મારી ઓફિસમાં તેની રજા જાહેર કરી છે! અને ઘણાં વર્ષો પછી આજના દિવસે ઠંડુ ખાવાની સજા પણ મળી છે. (ઉફ્ફ યે રીવાજ…)
– પેલો ઇંતઝાર હજુ પુરો થયો નથી અને બીજુ બધુ આનંદમય છે.
– સૌને હેપ્પી જન્માષ્ટમી. (એડવાન્સમાં..)
