– આજે આ નીરાળી પૃથ્વી પર આવ્યા તેને ૨૭ વર્ષ પુરા થયા; મતલબ કે આજે મારો ‘હેપ્પી બડ્ડે‘ છે! (ખરેખર, મજાક-મજાકમાં ઘણાં દિવસો નીકળી ગયા હોં…)
– લાગે છે કે આજકાલ દિવસો અને મહિનાઓ ટુંકા થતા જાય છે; જીવનમાં એક-પછી-એક વર્ષો ઉમેરાતા જાય છે. હજુ તો કંઇ ખાસ કર્યું નથી અને ઘણાં અરમાન પણ બાકી પડ્યા છે. (જો કે જીંદગીને ટુંકાતી જોઇને દુઃખી કરવા કરતાં આવનારા નવા વર્ષ માટે આશાવાદી બનવું વધારે ઠીક રહેશે.)
– એમ તો અત્યાર સુધી વિતાવેલી જીંદગી વ્યર્થ પણ નથી ગઇ; મેં હરપળને મારા દિલથી માણવાનો પુરો પ્રયત્ન કર્યો છે તેનો આનંદ છે. તે દરેક પળ આજે એક કડવી-મીઠી યાદગીરીઓથી ભરેલી છે અને તે દરેક ક્ષણમાં મેં નવા-નવા અનુભવ મેળવ્યા છે. (કેટલીક યાદગીરીઓ એટલી સુંદર છે કે તેને ખુશીઓથી સૌની સાથે વહેંચી છે; જયારે બીજીબાજુ કેટલાક અનુભવો એટલા ખરાબ છે કે તેમાંથી યોગ્ય શીખ મેળવીને દિલના અંધારા ખુણામાં દબાવી દીધા છે.)
– જો અત્યાર સુધીની જીંદગીનું કુલ ટોટલ કરીએ તો ઓવરઑલ ‘હેપ્પીવાલી લાઇફ‘ રહી છે. આ દુનિયાએ, મને મળેલા મિત્રો-લોકોએ અને મારા પરિવાર-માતા-પિતાએ મને મારી લાયકાત કરતાં ઘણું આપ્યું છે અને મારા પ્રત્યેના તેમના આ પક્ષપાત બદલ તેમનો આભાર પણ માનુ છું. (નોંધ: આ વાતને અપવાદરૂપ કિસ્સામાં ગણવી, ખાસ યાદ રહે કે હું પક્ષપાતનો ઘણો વિરોધી છું!)
– એક સમય હતો કે હું મારી બર્થ-ડેને મોબાઇલના રિમાઇન્ડર તરીકે ગોઠવતો કે જેથી મને સમયસર યાદ આવે! (હસવાનું નહી, મારા જેવા માણસો પણ હોય છે આ દુનિયામાં..) તે વખતે બર્થ-ડેટ તો યાદ રહેતી પણ ઘણીવાર આ દિવસ આવીને નીકળી જાય ત્યારે યાદ આવતું. જો કે તે રિમાઇન્ડર આજે પણ મને મારો બર્થડે યાદ કરાવે છે! હા, ગયા વર્ષે આ રિમાઇન્ડર શા માટે રાખ્યું હતું તે યાદ કરવું એ જ એક વિકટ પ્રશ્ન બન્યો હતો! 😉
– હવે બર્થ-ડે છે તો શું થયું, સેલીબ્રેટ કરવો જ પડે એવું જરૂરી નથી. હજુ સુધી આજના દિવસ માટે કોઇ પ્લાન નથી બનાવ્યો. (જો ટેણીયો અને તેની મમ્મી સાથે હોત તો કંઇક વિચાર્યું હોત, પણ એ તો અત્યારે પીયરમાં મ્હાલે છે, તો એકલા-એકલા શું સેલીબ્રેટ કરીએ?)
# ખાસ નોંધ: જો કોઇ મિત્રને મારી ઉપર ઘણો પ્રેમ આવી જાય અને મારી માટે કોઇ બર્થ-ડે પાર્ટી આયોજન કરવાનો કે સારી-મોટી ગિફ્ટ આપવાનો વિચાર થતો હોય, તો પ્લીઝ તે શુભ વિચારને માંડી ન વાળશો. માત્ર અને માત્ર તેની લાગણીઓને માન આપવા ખાતર અમે તેનો સ્વીકાર કરવા તૈયાર છીએ.
