• તો તું નહી આવે?
– ના.

• તને મન નથી થતું?
– મારે ખોટું નથી બોલવું.

• તો સાચું બોલી દે..
– સાચું મારા સુધી જ રહે એ ઠીક છે.

• તું આવો કેમ છે?
– હું આવો જ હતો, હંમેશાથી..

• તું મને હર્ટ કરી રહ્યો છે યાર..
– જાણું છું.

• તો પણ?
– હા, બીજો કોઈ રસ્તો નથી મારી પાસે.

• રસ્તો ન હોય એવું ન બને.
– આજે બન્યુ છે. હું ડેડ-એન્ડ પર છું.

• તું કેમ આવું કરે છે?
– ખબર નહી.. હવે આ એકજ વિકલ્પ દેખાય છે.

• આપણે આટલો સમય સાથે હતા તો એક દિવસમાં શું બદલાઇ ગયું એ તો બોલ?
– એક દિવસમાં નથી બદલાયું; દિવસે-દિવસે બદલાયું છે. હું બદલાઇ ગયો છું. આપણે બદલાઈ ગયા છીએ.

• તો શું થયું?
– એ જ તો ઘણું થયું છે.

• મને એમાં કોઈ વાંધો નથી યાર.. આપણે સાથે છીએ એ જ મહત્વની વાત છે..
– આટલું થયા પછી પણ સાથે છીએ એમાં મને વાંધો છે. મારું આમ બદલાઇને સાથે રહેવું હવે ફાવતું નથી. મને એ જ બની રહેવું છે જે હું પહેલાં હતો; હું એ નથી જે તારી સાથે છું.

• તો રહે ને પહેલાની જેમ; તને કોણ રોકે છે.
– આપણી વચ્ચે નામકરણ કરેલા આ સંબંધનું બંધન. તેનું તૂટવું જરૂરી છે.

• પણ કેમ? એમાં તારી પણ મરજી હતી.
– ના, માત્ર તારી ખુશી માટે મેં ત્યારે સંમતિ આપી હતી એ તું જાણે છે. મેં પરિણામ વિશે ચેતવી પણ હતી તને. હવે તારી વાતમાં નથી આવવું.

• આપણે મળીશું તો બધું ઠીક થઈ જશે.
– મને એ જ ડર છે અને પછી મને એનો પસ્તાવો પણ થશે.

• તું મારુંય નહી માને?
– હવે હું કોઇનુંય નહી માનું.

• પણ કેમ?
– કારણ તું જાતે જ સમજી લે. મારાથી હવે વધુ સમજાવી શકાય એમ નથી.

• મને સમજવું છે, પ્રયત્ન તો કર..
– તું મને નથી સમજી શકી બકા; તો મારા કારણને કઈ રીતે સમજીશ..

• તું મને ગુંચવે છે.
– હું પોતે ગુંચવાયેલો છે.

• કેમ આવી ગોળ-ગોળ વાત કરે છે?
– કેમ કે મારું મગજ ફરી રહ્યું છે.

• શું થયું છે યાર તને; કેમ આવું કરે છે.
– બહુજ ખરાબ લાગ્યું છે મને તારા છેલ્લા વર્તનથી; નફરત થઇ રહી છે મારી ઉપર પુરો અધિકાર જતાવતા એ સંબંધના નામથી. તારા એ હકથી હું મને પીંજરામાં પુરાયેલો, પોતાની જાતથી કપાયેલો, ફીલ કરી રહ્યો છું. હું કેવો હતો તે શોધી રહ્યો છું. 

• તો શોધ ને; એમાં મને કેમ દૂર કરે છે?
– તું વચ્ચે આવી રહી છે અને મને હરપળ તારા એ સંબંધને પાળવા અને તે મુજબ બદલવા દબાણ કરી રહી છે. હવે મારી સહનશક્તિ ખુટી છે.

• ઠીક છે તો સંબંધનું નામ હટાવી દઇએ, બસ. પણ એટલી વાતમાં અલગ થવાની શું જરુર છે?
– બહુજ જરુરી છે. આપણે આગળ વધી ગયા છીએ બકા. અહીયાં અટકવા માત્રથી બીજું અટકવાનું નથી અને પાછા જવું હવે આપણાં માટે શક્ય નથી.

• પણ એકવાર તો મળી લે.
– મળવા માટે કોઈ કારણ નથી દેખાતું.

• તો આ સંબંધ પહેલાં પણ આપણે કારણ વગર મળતા હતા જ ને?
– હા, એમ તો કારણ ઘણાં હતા; પહેલાં એકબીજા પ્રત્યે ઉંડી લાગણી હતી. ગુંગળામણ કે અપેક્ષા વગરનું જોડાણ હતું. જોડાણ હોવા છતાં આઝાદી હતી. જેમ છે એમ જ એકબીજાનો સ્વીકાર હતો અને હવે આ એકતરફી અધિકાર, બંધન.. નથી રહેવાતું. મને આઝાદ થવું છે.

• તું આઝાદ તો છે. મેં ક્યાં પકડી રાખ્યો છે તને?
– તે પકડી રાખ્યો છે. મને કાબુમાં કરી રાખ્યો છે. મને તું જ તો ચલાવી રહી હતી; હવે નહી ચાલી શકું એમ..

• હું એટલી ખરાબ છું?
– ના, હું વધારે ભોળો હતો. હવે મારા મન મુજબ રહેવું છે. પહેલાંની જેમ બંધન વગર જીવવું છે. મારાથી આમ બંધનમાં રહેવાય એમ નથી.

• ઠીક છે. પણ.. આટલી વાર મળ્યા છીએ તો હવે એકવાર-છેલ્લીવાર મળવાથી શું થઈ જશે?
– ભુલ.

• તો તું નહી જ આવે?
– હું જવાબ આપી ચુક્યો છું.

💔