બગ્ગુ’નો ત્રીજો જન્મદિવસ

16 એપ્રિલના દિવસે નાયરા ત્રણ વર્ષની થઈ. આ દિવસો ફટાફટ નીકળી ગયા હોય એમ લાગે તે મારા માટે હવે કોઈ નવી વાત નથી. સમયને પકડવામાં હું જ ધીમો હોઉ તો તેમાં સમયની ઝડપનો વાંક કાઢવો ઠીક નથી. (અબ જો સહી હૈ, તો હૈ)

સ્વાભાવિક છે કે આ દિવસ માટે અમે આનંદિત હોઈએ અને વિદેશી પદ્ધતિથી ઉજવણી કરવા આતુર બનીએ; પરંતુ કોરોના રોગચાળાથી ઉદ્દભવેલ વિચિત્ર પરિસ્થિતિ સામે લાચાર બનીને અમે પરિવારના સાડા-ચાર સભ્યોએ ટુંકમાં સંતોષ માની લીધો. (બીજો કોઇ વિકલ્પ પણ ન’તો.)

લોકડાઉન હોવાથી બહારથી કેક પણ મળી શકે એમ ન હોય ત્યારે મર્યાદિત સ્ત્રોત અને સાધનોનો ઉપયોગ કરીને ઘરે જ બધી વ્યવસ્થા કરવામાં આવી. મેડમજીએ ઘરે કેક બનાવી અને તે પ્રક્રિયામાં સહયોગ કરવાનો મેં પણ આનંદ લીધો. તે મીઠા પદાર્થની છબી અહી યાદગીરી તરીકે જોડવામાં આવી છે. (કોઇ દેખાડો સમજે, તો એ પણ ખોટું નથી. 😋)

એમ તો આ કેક’ને સજાવવાનો સંપૂર્ણ શ્રેય હું પોતાને આપીશ. આ ક્ષેત્રે કોઈ જ અનુભવ ન હોવા છતાં માત્ર બે-ત્રણ વસ્તુઓથી બધાને ગમે એવી સજાવટ કરવામાં હું સફળ થયો તે જાણીને મને પોતે નવાઇ લાગી. પોતાની કળા પર થોડુક અભિમાન પણ થઈ આવ્યું. (પોતાની કળા પર અભિમાન તો હોવું જ જોઇએ. 😎)

પ્રથા અનુસાર હેપ્પી બડ્ડે નાયરા ગીત ગાઇને અને કેક-કટીંગ વિધી પુરી કરીને જન્મદિવસની ઔપચારિકતા પુરી કરવામાં આવી. ત્યારબાદ એકબીજાને કેક ખવડાવીને મોઢું મીઠું કર્યું અને મેં ઢગલો ફોટોને કેમેરામાં કંડારીને સમયને ચિત્રમાં હંમેશા માટે સ્થિર કરવાનો પ્રયત્ન કર્યો. (સમય ક્યારેય અટકતો નથી, છતાંયે આપણે પ્રયત્ન છોડતા નથી હોતા.)

જન્મદિવસની કેક સાથે નાયરા..

કેક ઉપર ઉંમર દર્શાવતો નંબર 3 લખવો હતો પણ તે માટે બીજો ઉપાય ન સુઝયો એટલે મીણબત્તીનો ઉપયોગ કરીને મન મનાવ્યું; એમ પણ મમ્મીના આગ્રહથી મીણબત્તી સળગાવવા-બુઝાવવાની પ્રથા રદ કરી હતી. (રદ કરવાના કારણમાં વોટ્સએપ યુનિવર્સીટીનું જ્ઞાન જવાબદાર ગણી શકાય.)

આ ઉપરાંત આ દિવસની યાદગીરી તરીકે નાયરા સાથે અમે બધાએ બીજા ઘણાં ફોટો પણ ક્લીક કર્યા છે, જેને ગુપ્તતાના નિયમ અનુસાર અહી રજુ કરવામાં નહી આવે. #ક્ષમા

પણ બગ્ગુ પર એવો કોઇ નિયમ લાગુ થતો નથી, એટલે આ દિવસના સંભારણારુપ એવા બીજા બે ફોટો અહી ચોંટાડવાની મારી ઇચ્છા થાય છે. (અને મારી આ ઇચ્છા હું હમણાં જ પુરી કરુ છું! 😉)

આ વખતે પહેલીવાર જન્મદિવસે મારા વોટ્સએપ અને ફેસબુક-ઇન્સ્ટાગ્રામની પર્સનલ પ્રોફાઇલના સ્ટેટસમાં તે વિશે અપડેટ મુકવામાં આવી. (પ્રોજેક્ટઃ Being Social)

પરિવારજનો, મિત્રો અને બિઝનેસ-કોન્ટેક્ટ્સમાંથી અલગ-અલગ લોકોના ત્યાં બધે એટલા બધા મેસેજ આવ્યા કે બધાને પર્સનલી પ્રતિભાવ આપવો અઘરું કામ લાગ્યું એટલે ઉપરોક્ત દરેક જગ્યાએ સાંજે ફરી એક આભાર-સ્ટેટસ બનાવીને મુકવામાં આવ્યું. (અને તેની પર વળી અલગથી પ્રતિભાવ મળ્યા!)

અહીં તે આભાર-સ્ટેટસની ઇમેજને પણ ખાસ જોડવામાં આવે છે કેમ કે તેમાં નાયરાનો એક બહુજ મસ્ત ફોટો છે. વળી, અહીં મારા આનંદના ભાગીદાર બનનાર સૌનો આભાર માનવાનો મારો ઇરાદો પણ છે. 🙏

બંધનના આ દિવસને પણ અમે યાદગાર બનાવીને ખુશ થયા. ઉજવણીના આ દિવસે ઉપરની દરેક છબી કંડારનાર તથા તેમાં જરુરી કારીગરી ઉમેરનાર સજ્જનનો પણ ખુબ-ખુબ આભાર માનવો જોઇએ. (હા, અહીયાં મારી જ વાત થાય છે!)

😊