કેટેગરી અપડેટ્સ

મારા બગીચાનો અપડેટ્સ વિભાગ આપનું સ્વાગત કરે છે!
આમ તો અપડેટ્સ એ અંગ્રેજી શબ્દ છે પણ મેં અહીયાં તેને સહર્ષ સ્વીકારી લીધો છે! :)
આ વિભાગમાં મળશે રોજબરોજ બનતી ઘટનાઓ અને તેની આસપાસ વિંટળાયેલા મારા વિચારો-યાદગીરીની નોંધ મારી માતૃભાષા ગુજરાતીમાં.

Dec’20 – અપડેટ્સ

સૌથી તાજી અપડેટ્સમાં એ છે કે હવે સિઝન બદલાઈ છે અને ઠંડીની ઓફિસિયલી શરૂઆત થઈ ચુકી છે. (આ લીટીમાં ઓફિસિયલી શબ્દની કદાચ જરૂર નહોતી.)

કોરોના તો ફુલ ગતિમાં આગળ વધી રહ્યો છે અને તેની ગતિ રોકવાની કોઇનામાં તાકાત હોય એવું જણાતું નથી. સમય-જતાં લોકો ચેતે અને સુધરે તો વાત અલગ છે, પણ તેવી સંભાવના દેખાતી નથી. (હું પોતે પણ માસ્ક સિવાય બીજી કોઈ સાવધાની રાખતો નથી તો બીજાને શું કહી શકું..)

સજીવોની કક્ષામાં આવતા દરેકની આ એક સામાન્ય લાક્ષણિકતા કહી શકાય કે તે સ્થિતિ અનુરૂપ પોતાને ઢાળી લે છે. શરૂઆતમાં સ્વભાવ અનુસાર વિરોધ કરશે અને લડશે. જો જીતી જાય તો ઠીક નહી તો ધીરે ધીરે તેની સાથે સમાધાન કેળવશે. વધુ શક્તિશાળી વિરુધ્ધ લડાઈ નિવારવાનો પ્રયત્ન પણ કરશે. જ્યાં નિવારી ન શકાય ત્યાં સમાધાન કેળવશે અથવા તો શક્તિશાળીની શરણાગતિ સ્વીકારશે. જે સમાધાન કે શરણાગતિ ન સ્વીકારે તે લડીને નાશ પામે એવુંય બને અથવા તો વિજયી થઈને પોતાનો મજબુત વંશ આગળ વધારે. આખું ચક્ર આમ નિરંતર ચાલ્યા રાખે. આપણી સૃષ્ટિનો આ એક નિયમ છે અને આ નિયમથી આપણે સૌ જીવ બંધાયેલા છીએ. (વિનંતીઃ આ જ્ઞાન ઉછીનું નથી. બાબા બગીચાનંદે સ્વયં સાધના કરીને મેળવ્યું છે! તેમની ઈજ્જત ભલે ન કરો પણ આ જ્ઞાનને થોડીક રિસ્પેક્ટ આપશોજી. 🙏)

મૂળ અપડેટ્સ પર આવું. ઘણાં દિવસથી વેકેશનબાજી કરી રહેલા વ્રજ-નાયરા અને મેડમજીને શનિવારે લેવા જવાનું છે. સ્કૂલ તો ઘણાં દિવસથી ચાલુ થઈ ગઈ હતી પણ ઓનલાઈન-એજ્યુકેશનની ગમે-ત્યાં-ભણો પધ્ધતિનો ફાયદો ઉઠાવાઈ રહ્યો છે. (‘એજ્યુકેશન’ને ‘એડ્યુકેશન’ કહી શકું એટલો હજુ મોડર્ન નથી થયો.)

આ વખતે એકલાં રહેવાનો સમય થોડો લાંબો રહ્યો, તો પણ મને તેમાં વાંધો ન રહ્યો! હું એકલો રહીને પણ ઘણો ખુશ રહેતો માણસ છું. બધા સાથે હોવાનો અનેરો આનંદ હોય અને એકલાં રહેવાની પણ એક અલગ મજા હોય. યે ભી એક મૌસમ હૈ; તુમ ક્યા જાનો! એમપણ આ વખતે તો એકલાં રહીને એકલો ન રહ્યો હોઉં એવી મારી સ્થિતિ રહી છે.

સાઈડટ્રેકઃ ઉપરની છેલ્લી લાઈન લખતાં-લખતાં તેને મળતી આવે એવી એક ગઝલની બે લાઇન યાદ આવી રહી છે; કે..

મનની સ્થિતિ હંમેશા આશિક રહી છે,
કાલે જ મેં કોઈને માશુક કહી છે…

અચ્છા કોઈને આ ગઝલની શરૂઆત યાદ છે? મને તો આખી ગઝલ બહુ ગમે છે. મારી સમજણના સમય પહેલાંથી એ ગમે છે. હા, સમજણના સમય પહેલાંથી ગમવું-સમજવું એ એક વિચિત્ર ઘટના પણ કહેવાય જે મારી સાથે કાયમ બનતી રહી છે. (આવી વિચિત્રતાઓને લીધે જ હું વિચિત્ર કહેવાઈ જાઉ છું. બાકી તો સાવ સીધો માણસ છું.)

ખૈર, જો કોઈને આ ગઝલ અને તેની સંગીતમય પ્રસ્તુતિ ગમે તો કહેજો, તો આપણે આપણાં ફેવરીટ-સોંગ નું લિસ્ટ એકબીજા સાથે વહેંચીશું. ઘણાં સમય પહેલાં યુ-ટ્યુબ પર પ્લેલિસ્ટ બનાવ્યું હતું જે પછી ભુલાઈ પણ ગયું હતું. આજકાલ એકલાં સમયનો સદુપયોગ કરીને તેમાં નવા ગીતો પણ ઉમેર્યા છે. યુ-ટ્યુબ પર Baggi’s Select સર્ચ કરશો તો તરત મળી જશે! (એમ તો 90s ના ગીતો હજુયે ઘણાં વધારે છે.)

ઘરથી થોડા દૂર અંતરે એક વધુ કામ શરૂ થવાનો સમય નજીક આવી ગયો છે. મારા માટે કમ્ફર્ટ-ઝોન બહારનું કામ છે; પરંતુ તેને ચેલેન્જ તરીકે સ્વીકારીને બતાવી દેવાનું મન થાય છે. (કોને બતાવી દેવું – એ હજુ નક્કી નથી.)

સાચું કહું તો મારી પાસે અત્યારે પુરતું છે તો હું આ નવું કેમ શરૂ કરી રહ્યો છું તે માટે સાચે જ મારી પાસે કોઇ કારણ નથી. જરૂરથી વધારે ભેગું કરવામાં સરવાળે માણસ ઘસાઈ જતો હોય છે અથવા તો સંપતિ માટે વધુ ભુખ્યો થતો જાય છે. સંતોષ એકંદરે સુખ આપે છે. એમ તો પૈસા કમાવવા પણ એટલું જ જરૂરી છે. બસ, તેની એક હદ રાખવી પડે. (વગર પૈસે વૈરાગ્યની વાતો કરવા કરતાં પૈસા ભેગા કરીને જો વૈરાગ્યનો દેખાડો પણ કરશો તોયે ચાર માણસમાં પુછાતા રહેશો. 😎)

તો, હું સંતોષના પક્ષમાં છું કે વધુ ભેગા કરવાના પક્ષમાં? ..આજે ફરી એકવાર હું કોઈ એક પક્ષને પસંદ કરવાને બદલે મધ્યમાં રહેવા મજબૂર જણાઉ છું. (સંસાર પોતાનો મત જાતે જોઈ–વિચારી–સમજીને પસંદ કરે. બાબા યહાં આપકી કોઈ હેલ્પ નહી કર શકતે.)

લાંબા સમયથી લખાયેલી એક પોસ્ટ ઘણાં દિવસથી ધક્કે ચડી રહી છે તો વિચારું છું કે તેને ન્યાય આપુ. પણ, તેના પછી મને કેટલાક લોકો ગાળો આપે એવી શક્યતા વધુ છે એટલે જ તો ટાળી રહ્યો છું. ઓકે.. એમાં શું વિચારવાનું? જે થશે એ જોયું જશે. આ મારો બગીચો છે; તો મને ગમે એમ કરી શકું. (એમપણ નવી પોસ્ટના ઈ–મેલ ચુપચાપ બંધ કર્યા પછી અહીં ખાસ લોકો આવતા નથી એટલે કોઈ વાંધો નહી આવે.)

કદાચ હવે અપડેટમાં નોંધવા જેવું બીજું કંઇ ખાસ જણાતું નથી. કોરોનાથી બને એટલું સાચવવાનું છે. બેધ્યાન ભલે રહીએ તો પણ ડરતા રહેવાનું છે. ડર હશે તો જ ચેતીને રહેવાશે!

હેડર-ફોટોઃ નખ રંગવાની શોખીન નાયરા’ના બે હાથ. આજકાલ તેનો આ શોખ જોઈને મારે નેઇલ-પૉલીશ બનાવવાનો ધંધો વિચારવો પડે એમ છે!

અણધાર્યું જો ને એવું રે થાશે..

~ અમદાવાદમાં ગયા અઠવાડિયે બે દિવસના લોકડાઉન ઉર્ફે કરફ્યુમાં કોરોનાની શરૂઆતના એ દિવસો યાદ આવી ગયા.

~ આ વખતે થોડોક ફરક એ રહ્યો કે દિવાળી પછી રજાઓના જ દિવસો હતા એટલે કોઈ વધારે અસર ન થઈ; પણ દુઃખ એટલું થયું કે રજાઓમાં ફરવા-રખડવાનો પ્લાન રદ કરવો પડ્યો અને ઘરમાં પુરાઇને બેસી રહેવું પડયું. (થાય એ પણ ક્યારેક.)

~ હજુયે અમદાવાદમાં અને બીજા મોટા શહેરોમાં 9 થી સવારે 6 સુધીનો રાત્રી કરફ્યુ અમલમાં છે. કોરોના રાત્રે જ હુમલો કરે છે એમ તો ન જ કહેવાય પણ રાતે ખાવા-પીવા-ટહેલવા નીકળતાં અને એક-બે જગ્યાએ ટોળે વળતાં અમદાવાદીઓને બિમારીની અસર પ્રત્યે થોડા સિરિયસ બનાવવા માટે આ રીત પણ ઠીક છે. હા, કરફ્યુ ટાઇમમાં રાત્રે એકાદ કલાકની વધુ છૂટ મળે તો કેટલાક ધંધાકીય એકમ અને દુકાનો, શો-રૂમ માટે સારું રહે. (કેટલાક તો કરફ્યુ હોવો જ ન જોઇએ એમ પણ કહેશે.)

~ સરકારને સલાહ આપનાર એમપણ વધારે છે એટલે મારી સલાહ-પોટલી બંધ રાખું એ જ ઠીક છે. (આમેય અમારું કોઈ માને એમ નથી.)

~ એક રીતે જોઈએ તો સરકાર કંઈ નથી કરતી એમ ન કહી શકાય અને ક્યાંક વધુ પડતું કરે છે એમપણ કહેવાય! બીજું બધું તો ઠીક પણ ધંધા અને ટ્રાન્સપોર્ટના નિયમોમાં અચાનક ફેરફાર ન કરે એટલી હાથ જોડીને વિનંતી છે. કેમ કે એ બધુ જ ડિસ્ટર્બ કરી દે છે અને ફરી પાટે ચડાવવામાં વેપારીઓનો દમ નીકળે છે. (સરકારભાઇ, ફરીથી કહું છું કે વેપારીઓને મરવા ન દેતા. પલીજ.)

~ કોરોના/કોવિડ-19 ના ફેલાવા વિશે તો વાત કરવા જેવી નથી. અહિયાં આજકાલ કેસ ખરેખર એટલા બધા છે કે તમે સરકાર કહે એટલું જ સમજો તો ઠીક છે. હકીકત જોવા જશો તો મગજ ચકરાવે ચડી જશે. (લગભગ બધાને એકવાર કોરોના થઈને જ રહેશે એવું લાગે છે.)

~ અમારી આસપાસ સોસાયટીઓમાં 50 થી વધુ કેસ હાલમાં એક્ટિવ છે. ડર સાવ નથી એમ ન કહી શકું પણ તોય હજુ અમે અમારી દિનચર્યા બદલી નથી. (આ બહાદુરી ગણાય કે મુર્ખામી એ નક્કી કરવાનું બાકી છે.)

~ ક્યારેક તુત લાગે છે તો ક્યારેક તોપ લાગે છે, ક્યારેક આ કોરોના મને બહુરુપી લાગે છે. કોરોના-ગ્રસ્ત બનીને ઠીક થયા હોય એ માંથી 49.50 ટકા એ પક્ષમાં છે કે કોરોનાથી ડરવા જેવું કંઈ જ નથી; કેમ તે સામાન્યથી ભારે તાવ અને શરદીથી વધું નથી અને થોડા દિવસની સામાન્ય દવામાં ઠીક થઈ શકાય છે. જ્યારે 49.50 ટકા લોકો એ પક્ષમાં છે કે કોરોનાને જરાય હળવાશથી લેવા જેવા જેવો નથી; કેમ કે આ એક જીવલેણ વાયરસ છે. (બચેલા 1 ટકા લોકો મારી જેમ કન્ફ્યુઝ છે અથવા તો બંને બાજુ હિલોળા લીધા કરે છે.)

~ રસીનું પરીક્ષણ પણ ચાલી રહ્યું છે. ટેસ્ટીંગ ડોઝ અપાઇ ચુક્યા હોવાના સમાચાર છે. મોદી સાહેબ પણ ખાસ તેના માટે ફરી ગુજરાત-અમદાવાદની મુલાકાતે આવવાના ન્યૂઝ જાણ્યા છે. (મુલાકાતના બીજા કોઈ ઉદ્દેશ સંસ્થાના ધ્યાનમાં નથી આવ્યા.)

~ ઠીક છે તો જે થશે એ જોયું જશે. અન્ય લોકો સાથે સંપર્કમાં આવો ત્યારે ખાસ માસ્ક પહેરવું અને સામાજીક અંતર જાળવવું એ જ હાલ સૌથી મોટો ઈલાજ છે. ચેપથી બચવા હાથ ચહેરાને ન અડે તે પણ ધ્યાન રાખવું એટલું જ જરુરી છે.

~ અંતે તો.. અણધાર્યું જો ને એવું રે થાશે; મન કે ચિત્તમાં ન હોય…

😷

Nov’20 – અપડેટ્સ

~ તો, ઠંડી આવી ગઈ. હું પણ આવ્યો છું. એમ તો બે દિવસથી અહિયાં છું; પણ લખવાની જગ્યાએ બીજા આડાઅવળા કામ જ કર્યા છે. (મને ગમે છે તો કરું છું; કોઇને તકલીફ હોય તો જણાવે.)

~ મુખ્ય બદલાવ એ છે કે મેં મારું ઇ-સરનામું બદલ્યું છે; જે પહેલાં mail@marobagicho.com હતું, તે હવે b@marobagicho.com કર્યું. તેની પાછળ કોઈ મોટું કારણ નથી. બસ, મને બદલવું હતું તો બદલી દીધું છે અને સબસ્ક્રાઇબર્સને પણ નવા રુપરંગમાં ઇમેલ મળશે એવી ગોઠવણ કરી છે. (ફરી એકવાર કારણ વગરનો બદલાવ.)

~ આમ તો મને કોઇપણ સરનામે ઇ-ટપાલ લખો તો છેવટે એક જ ઇનબોક્ષમાં આવતી હોય છે! હા, ફરક એ રહેશે કે હવે મારા દ્વારા મોકલવામાં આવતા ઇમેલ નવા સરનામાથી હશે. લાગતા-વળગતાં અને મારા નિયમિત ઇમેલને સહન કરતાં લોકો નોંધ લે. જૂનું ઇમેલ ઍડ્રેસ પર ઇમેલ સ્વીકારવાનું ચાલું જ રહેશે. (આ સિવાય બીજું ખાસ કંઈ નોંધ કરવા જેવું નથી.)

~ ગયા મહિને પારિવારિક કારણસર મધ્યપ્રદેશથી મહારાષ્ટ્રના જલગાંવ સુધીની મુસાફરી કરી. બે દિવસ વિતાવ્યા અને ત્રણ દિવસે પરત આવ્યા. વરસાદ સમયે રોડ બગડવા વિશે ભલે ઘણો કકળાટ કર્યો હોય પણ આપણાં પડોશી રાજ્યોના સ્ટેટ હાઇ-વે અને ગામડાના રસ્તાઓની હાલત જોઇને સમજાયું કે ગુજરાતના રોડ-રસ્તાઓ ઘણી સારી હાલતમાં છે જે માટે આપણે અભિમાન કરવું જોઈએ! (સ્ટેટ-બૉર્ડર ક્રૉસ કર્યાનો અનુભવ જ કહી દે કે તમે હવે ગુજરાતમાં નથી.)

~ એમ તો મુસાફરી બીજી પણ ઘણી રહી છે એટલે દરેકનો ઉલ્લેખ કરવો અઘરો છે અને ઘણી વાતો ભુલાઇ ગઈ છે; અને જો યાદ કરી-કરીને લખવા જઈશ તો આ પોસ્ટ આજે પુરી નહી થાય. (એમ તો મૂળ સમસ્યા યાદ કરવાની છે અને તે માટે મારી ટુંકી યાદ-શક્તિ પર જુલમ થાય એમ નથી.)

~ ‘હાય-હાય કોરોના’ કરવાનું અમે મુકી દીધું છે. થોડી સાવચેતી સાથે તેની સાથે રહેવાની ગોઠવણ કરી લીધી છે. હવે એટલો ડર પણ નથી લાગતો. (જે થશે એ જોયું જશે એ મુખ્ય મંત્ર છે.)

~ સુપ્રીમ કોર્ટની દખલ બાદ હવે લોકડાઉનમાં સમયસર હપ્તા ભરવાનો થોડોક ફાયદો બેંક તેના ગ્રાહકોને આપી રહી છે જે ગમ્યું. GST અને તેના માટે સરકારની કડકાઈને માત્ર મોદીના નામે સહન કરી રહ્યા હોઇએ એવું છે. કામ-ધંધા લગભગ ટ્રેક પર આવી રહ્યા છે પણ નિર્મલાબેન કાચા પુરવાર થઈ રહ્યા છે. સરકારને આવકની જરૂર છે તેમાં સહમત; પણ વેપારીઓને મરવા ન દેતા બેન. (મોદીસાહેબ સાથે કોઇની નજીકની ઓળખાણ હોય તો મારી આ વાત પહોંચાડજો.)

~ અમેરિકામાં સત્તા પરિવર્તન અને ચૂંટણી પ્રક્રિયા માટે આ વખતે ભારતીય ઉપખંડમાં લોકો અતિ-ઉત્સાહ દેખાડી રહ્યા છે જે મારી સમજ બહાર છે. હા મને તેના પરિણામ જાણવામાં રસ હોય છે પણ તેના કારણો વિશેની ચર્ચામાં પડવું ક્યારેય જરુરી નથી લાગ્યું. કોઇ કારણસર આ વખતે દેશ-વિદેશની બીજી બધી વાતોથી પણ દૂર રહી ગયો છું. જોકે તેનો કોઈ અફસોસ નથી. (એકંદરે શાંતિ છે.)

~ ટીવી ન્યૂઝ અને મીડીયાને તો ઘણાં સમય પહેલાં હાથ જોડી દીધા છે અને કેટલાયે લોકોને તેમ કરવા સલાહ પણ આપી ચુક્યો છું. ખરેખર, ગજબ માનસિક શાંતિ મેળવી શકાય છે અને પોતાની અંદર ઘણી નકારાત્મકતાને પ્રવેશતા અટકાવી શકાય છે. (આ કિંમતી સલાહ મફતમાં આપી છે એટલે કોઈ તેનું મૂલ્ય નહી સમજે એ મને ખબર છે.)

~ થોડા જ દિવસોમાં દિવાળી છે. પછી થોડી રજાઓ. દિવાળીની રજાઓ પછી મારા માટે અલગ પ્રવૃતિમાં પ્રવેશ લેવાનું થશે. થોડાક નવા લોકો, એક નવી પ્રવૃત્તિ અને તદ્દન નવી જગ્યા. હાલ તો તે સમય માટે ઉત્સાહમાં છું એટલે મજા આવશે એમ લાગે છે. (મારો આ ઉત્સાહ ટકાવી રાખે એવી રમેશભાઇને વિનંતી.)

~ વ્રજ-નાયરા દિવાળી-વેકેશનમાં નાના-નાની પાસે જવાની જીદ કરે છે અને મેડમજી તો ત્યાં જવા માટે રેડી જ હોય; એટલે એક ધક્કો ત્યાં થશે. આમ તો છોકરાંઓ માટે આ આખુ વર્ષ વેકેશન જેવું રહેવાનું છે, તોય સ્કુલમાંથી દિવાળીનું વેકેશન આપવામાં આવ્યું છે. (નિયમ એટલે નિયમ!)

~ દિવાળીએ ફરવા જવાનો વિરોધી હોવા છતાં આ વખતે ખબર નહી કેમ મને ક્યાંક જવાની ઘણી ઇચ્છા થાય છે. ક્યાંક દૂર થોડા દિવસ અજાણ્યા વાતાવરણમાં ગુમ થઈ જવાનું મન થાય છે. સાચું કહું તો લોકડાઉન-મોડ માંથી બહાર નિકળવા માટે મને એક બ્રેક જોઈએ છે. (જેમ હિરો હિરાને કાપે એમ આ બ્રેક મને લોકડાઉન અસરમાંથી બહાર કાઢી શકે છે.)

~ એમપણ મેડમજી અને બાળકોના પ્લાન નક્કી છે તો વિચારું છું કે તેમને ત્યાં મુકીને પછી એકલા ક્યાંક જઈ શકાય એવું ગોઠવું. (સ્થળ પણ કેટલાક શોધી રાખ્યા છે જ્યાં એકલાં જઈ શકાય.)

~ દિવાળી સુધી અહીયાં નિયમિત લખતા રહેવાનો વિચાર પણ છે. લોકડાઉન પહેલાં કરેલ એક-બે સ્થળ મુલાકાતની વાતો ઉમેરવા જેવી લાગે છે. તે સિવાય એમ જ કારણ વગર અથવા તો કોઈ કારણસર લખાયેલી અપડેટ સિવાયની અસ્તવ્યસ્ત વાતો પણ ડ્રાફ્ટમાં રાહ જોઈ રહી છે તો તેને પણ ન્યાય આપવાનો વિચાર છે. (અંતે તો મનમાં આવશે એમ જ થશે.)

👍