ફેરવિચારણા અને બદલાવ

ટેકનીકલ અપડેટ્સમાં મારા સિવાય બીજા કોઇ રસ લેશે એવું લાગતું નહોતું પણ થોડું આશ્ચર્ય થયું. મિત્રો અને વડીલોએ આંશિક વિરોધ પણ નોંધાવ્યો.

આમ તો આવી ઇચ્છા પહેલા પણ મનમાં આવી હતી અને ઇમેલ રોકવાનો પ્રસ્તાવ તે સમયે ચુપચાપ પાસ કરીને અમલમાં મુકી દેવામાં આવ્યો હતો. (આ વખતે ડોઢ ડાહ્યા થઇને મોટા ઉપાડે જાહેરાત કરી એટલે નજરે ચડી જવાયું. 🤦‍♂️ )

આ વખતે મારો મુળ વિચાર કંઇક નવા-જુની કરવાનો જ હતો. પરંતુ કેટલાક વિચિત્ર કારણસર અન્ય બદલાવની ઇચ્છાઓ ફરી વિચારોના પ્રવાહ સાથે તણાઇ આવી. આ એ જ ઇચ્છાઓ હતી જેને ઘણાં સમયથી ટાળવામાં આવતી હતી; પણ આ વખતે અગાઉ વિચારાયેલ ઘણાં જ બદલાવ માટે મારું મન મનાવી ચુક્યો હતો.

આગળની પોસ્ટ તે વિશેની નોંધ માત્ર હતી કે હું શું-શું બદલવા ઇચ્છુ છું; જો કે તે બધું કરું કે ન કરું તેનાથી કોઇ મોટો ફરક નથી પડતો અને લગભગ બીજા કોઇને પણ કંઇજ ફરક ન પડે. (એક રીતે તો આ બધું આમ લખવું જરુરી ન હોય પણ હું તો મારી માટે તેની નોંધ કરવા ઇચ્છતો હતો, જેથી આ બધા વિચારો અને બદલાવ વિશે ભવિષ્યમાં ફરી જાણી શકુ.)

આગળની પોસ્ટમાં નોંધાયેલા બધા વિચારો અને ઇચ્છાઓનો અમલ કરવાનું નક્કી જ હતું; પરંતુ હવે જેમની સાથે એક અકળ-સંબંધથી જોડાયેલા છીએ તેવા મિત્રોની લાગણીનું થોડુંક માન રાખવું પણ ઠીક લાગે છે. અહીયાં કોઇ-કોઇ ફેરફાર તો થઇ જ ચુક્યા છે અને બીજા ફેરફાર આ પોસ્ટથી થઇ રહ્યા છે. (કેટલાક ફેરફાર તરત દેખાઇ આવશે અને કેટલાક ધીરે-ધીરે જણાશે.)

ઇમેલ, ફેસબુક અને ટ્વીટર પર આ વિશે મારી પાસે પ્રેમથી જાણકારી માંગવામાં આવી. તે દરેકને એક પછી એક પ્રતિભાવ આપ્યા પણ છે કે કોઇ ખાસ કારણ નથી. (આ તો એવી રીતે કહું છું જાણે હજારો લોકોએ મને પુછી લીધું હોય! 😎 ડીયર બગી, તુ એટલો ફેમસ પણ નથી યાર.., ચોખવટથી બોલ કે માત્ર 9 જ લોકો છે, જેઓએ તને આ વિષયે પુછ્યું છે. #પ્રામાણિકતા)

ટાળવામાં આવેલ વિચારો/બદલાવની નોંધઃ

રીડર-ફીડ ચાલુ રહેશે. કારણ કે વધુ વિરોધ આ મુદ્દે થયો.
જેટપેક સાથેનું જોડાણ કાયમ રહેશે; તેના વગર મોબાઇલ એપથી બ્લોગ હેંડલ કરવો અઘરો જણાય છે. આ ઉપરાંત જેટપેક વગર ઘણી નાની-મોટી સમસ્યા ઉભી થતી હતી એટલે જાહેર-હિતમાં અમે તે મુદ્દે યથાસ્થિતિ જાળવવાનું વધુ યોગ્ય સમજીએ છીએ.
આ સમસ્યાઓમાં મને સૌથી વધુ વાંધો રેન્ડમ-પોસ્ટ વિશે હતો, કેમ કે તેના વગર મને મજા ન આવે. તે પછીના વાંધામાં વર્ડપ્રેસ-રજીસ્ટર્ડ મુલાકાતીઓને પ્રતિભાવ માટે દર વખતે નામ-સરનામાનું ફોર્મ ભરવું પડે એ સમસ્યા હતી અને એ જ રીતે તેમના પ્રતિભાવનો જવાબ આપતી વખતે મને પણ કરવું પડે! અને આ બધું મારા જેવા આળસુ જીવને મંજુર ન હોય તે આપ પણ સમજી શકો છો. (આ બધું જેટપેક વગર અલગ પ્લગીનથી પણ મેનેજ થઇ શકે. બટ, તેને શોધવાની અને ઇન્સ્ટોલ કરવાની મહેનત કરશે કોણ? હું તો નઇ કરું.)

થયેલ બદલાવ/ફેરફારની નોંધ

ઓકે, ઉપર નોંધ કર્યા મુજબ રીડર-ફીડ રોકવાનો વિચાર ચોક્કસ ટાળવામાં આવ્યો છે, પણ આ પોસ્ટને રીડરમાં દેખનાર સમજી ગયા હશે કે અમે તે મુદ્દે શું કારીગરી કરી છે! (પ્લીઝ ગાળો ન આપતા. 🙏 #રીકવેસ્ટ)
# સાઇડટ્રેકઃ મને જે કરવું હતું એ થઇ જાય અને મિત્રોનું માન પણ જળવાઇ જાય એવો વચલો રસ્તો પસંદ કર્યો છે. રીડર વાચકો હેરાન થશે એ જાણીને હું પોતે મારા આ કૃત્યની કડી-નીંદા કરુ છું! આ દુઃખના સમયમાં મારી પુરી સંવેદના તેમની સાથે છે. (વાચકો ઇચ્છે તો આ મુદ્દે મોદીનું રાજીનામુ માંગી શકે છે.)
પર્સનલી ઇમેલ કરવા માટે કેટલાકે રસ દાખવ્યો એટલે થયું કે એમ યાદ કરી-કરીને ઇમેલ કરવા કરતાં સબક્રાઇબર્સને ઓટોમેટીક જતા ઇમેલ ફરી શરુ કરી દેવા. હા, અહીયાં બદલાવ એ રહેશે કે તે દરેક ઇમેલ માત્ર નવી પોસ્ટ રજુ થયાની જાણકારી સમાન હશે.
જેટપેકનું જોડાણ યથાવત છે પણ પોસ્ટ અને કોમેન્ટમાંથી લાઇકનું બટન હટાવી લેવામાં આવ્યું છે. લગભગ તેના પછી હવે સાઇટની સ્પીડ ડબલ થઇ ગઇ હોય એવું લાગે છે! અથવા તો તેવું થયું હોવાનો મને ભ્રમ જણાઇ રહ્યો છે. (ગુગલ PageSpeed Insights માં પણ ચકાસી લીધું છે. એ તો ખોટું ન જ બોલે ને? જે સ્પીડ-આંક પહેલા 25-35 વચ્ચે રહેતો તે હવે 80-90 વચ્ચે રહે છે!)

એમ તો આગળની પોસ્ટથી જ ફેરફારના અમલરૂપે લાઇક-બટન હટાવી દેવામાં આવ્યું હતું. આજે અચાનક રીડરમાં નજરે આવ્યું કે મારી છેલ્લી પોસ્ટમાં ચાર લાઇક્સનો આંકડો દેખાય છે! કદાચ બ્લોગનું મુળ સોફ્ટવેર વર્ડપ્રેસ અને જેટપેક સાથે જોડાયેલું હોવાથી રીડર ઓટોમેટીકલી લાઇક્સ સ્વીકારવાનું બટન ત્યાં મુકી દેતું હશે અને વાચકો ત્યાં લાઇક કરી શકતા હશે. એમ તો મુળ વેબ-સાઇટમાંથી તે બટન હટાવવાનો ફરક એ જણાયો છે કે તે લાઇક્સ વિશે મને કોઇ નોટીફીકેશન મળતા નથી; જો કે હવે તેનો કોઇ હરખ-શોક પણ નથી. #અનાશક્ત

ટેકનીકલ વિચારો

થોડા દિવસ પહેલા હોસ્ટીંગ-ડોમેઇન રીન્યુ કરવામાં આવ્યા, તો લાંબા સમય પછી આ બગીચાની ઇ-જગ્યા પર ધ્યાન ગયું અને થયું કે લાંબા સમયથી તેમાં કંઇ નવા-જુની નથી થઇ. (હા, અમને એવું પણ થાય.)

દેખાવ-થીમ તો સેટ જણાય છે, પણ બગીચાના બેકગ્રાઉન્ડમાં ઘણીવાર લીલા બગીચાનું વાતાવરણ ઉભું કરવાની ઇચ્છા થાય છે. (ક્યારેક મસ્ત હરિયાળો બગીચો હતો ત્યાં, પણ હું એમ એક દેખાવમાં અટકું તો ને…)

આમ તો તેવું કરવા જતાં અત્યારની સાદાઇ-સરળતા ખોવી પડે અને સૌથી વધું સમસ્યા બેકગ્રાઉન્ડને લીધે શબ્દોને વાંચવામાં થતી અગવડનો જણાય છે; એટલે ઇચ્છા હોવા છતાયે બેકગ્રાઉન્ડ બદલવાનુ મોકુફ રાખવું પડે છે. (બીજા ભલે ન વાંચે પણ હું પોતે ક્યારેક અહીયા આવીને એમ જ રેન્ડમ-પોસ્ટ જોતો હોઉ છું. મને એવું ગમે છે.)

ખબર છે કે મારા સિવાય કોઇ જોવાના નથી છતાંયે મન મનાવવા બગીચાના દરેક ઇ-પેજના અંતમાં ગોઠવાય એમ હરિયાળી મુકી દિધી છે; હવે મને સારું ફીલ થાય છે! #ફીલગુડ.

જે લોકો વાંચે છે તે એમપણ રીડરમાં જ જોતા હશે એવું મને લાગે છે, તો તેમના માટે આ સુધારાઓમાં કંઇજ નવું નહી હોય. હા, ક્યારેક મારા બગીચાની દરેક નવી પોસ્ટના સ્વયંસંચલિત ઇમેલ અટકાવવાનો નિર્ણય લીધો હતો તેમ રીડરમાં જતી પોસ્ટ-ફીડને પણ અટકાવવાની ઇચ્છા થાય છે. ખબર નહી કેમ પણ એમ લાગે છે કે આ બગીચો ભલે જાહેર-જનતા માટે ખુલ્લો રહે અને કોઇપણ આવે-જાય, પ્રતિભાવ આપે… પરંતુ અહીયાં એ જ આવે જે ખરેખર અહીયાં જ આવવા ઇચ્છતા હોય. મારા લખાયેલા બધા શબ્દો અન્ય કોઇપણ માધ્યમ દ્વારા તેમની પાસે પહોંચીને નાહક કનડગત ન કરે.

હા, જે ચાર-લોકો આ ઠેકાણે નિયમિત આવે છે તે લોકોને પર્સનલી ઇમેલ કરી દઇશ જેથી તેમની ભાવનાઓ સાથે અન્યાય ન થાય. એમ તો વિચારું છું કે બગીચાના જે-જે સોસીયલ પેજ કે એકાઉન્ટ છે તેમાં સમયસર નવી પોસ્ટની ટુંકી જાણ થતી ચાલું રહેવા દઉ; જેને ઇચ્છા હોય એ જ ક્લીક કરીને અહીયાં સુધી આવે. (હા, એ પણ સ્વ્યંસંચાલિત હોય ત્યાં જ; હું અપડેટ કરવા માટે ધક્કો ખાવા નહી જઉ. #બસ_બોલ_દીયા)

એક મોટા સુધારા તરીકે એમ પણ ઇચ્છા થાય છે કે બગીચા સાથે જેટપેકના સંબંધનો અંત કરું. તે જાળવી રાખવાનું મુખ્ય કારણ વર્ડપ્રેસ બ્લોગર્સના લાઇક્સ અને મુલાકાતીઓના રીડીંગ-સ્ટેટ્સ તથા ઇનસાઇટ્સ મેળવતા રહેવાનું હતું. પણ હવે તે માટે ખાસ ઉત્સાહ જણાતો નથી એટલે તે ન રહે તો તેનો વાંધો નથી પણ તેના ન હોવાથી વેબસાઇટ ઘણી જ ફટાફટ ખુલે છે અને મને તેમાં વધુ રસ છે. (આ મુદ્દો સેલ્ફ હોસ્ટેડ બ્લોગ ચલાવતા બ્લોગર્સ જ સમજી શકશે.)

ખૈર, છે તો બધા વિચારો અને ઇચ્છાઓ જ… છેવટે જે ઠીક લાગશે તે કરીશ.

Jan’14 : અપડેટ્સ

– છેલ્લી પોસ્ટ વખતે આપણે મળ્યા તેના પછી તો એક આખુ વર્ષ બદલાઇ ગયું. (ઘણો લાંબો સમય કહેવાય, નહી!)

– પહેલા તો સૌને વેલકમ આ નવી જગ્યાએથી. (‘નવી જગ્યા’ કઇ રીતે? – એ માટે અહી છેલ્લી પોસ્ટ જોઇ લેવી, જે જુની જગ્યાએથી લખાયેલી છે પણ બેકઅપની સાથે-સાથે અહી ખેંચાઇ આવી છે.)

– મુળ દેખાવ એ જ રાખવામાં આવ્યો છે એટલે કોઇને નવું કંઇ ન લાગે પણ જે લોકો વર્ડપ્રેસ.કોમ અને સેલ્ફ હોસ્ટેડ બ્લૉગ વચ્ચેનો તફાવત જાણતા હશે તેમને સમજાઇ જશે કે અહી નવું શું છે. (મુળવાત: હવે અહી કોઇ ફ્રી સર્વિસ નથી કે કોઇની જાહેરાત પણ નથી!)

– ટ્રાન્સફરની આ પ્રક્રિયા એકંદરે સરળ રહી. વિચાર્યું’તુ તેના કરતા પણ સરળતાથી મેં આખો બ્લૉગ ટ્રાન્સફર કરી લીધો. (થેન્ક્સ ટુ… વર્ડપ્રેસ હેલ્પીંગ મન્કીઝ એન્ડ support-forum.)

– બ્લૉગ ‘PAGE HITS’ અને ‘LIKES’ ની હવે શુન્યથી શરૂઆત થઇ છે. તેનો જુનો ડેટા અહી ટ્રાન્સફર કરવા માટે jetpack.me ની મદદ માંગી છે, જોઇએ શું જવાબ આવે છે. (એમ તો મને શુન્યથી શરૂઆત કરવામાં કોઇ પ્રોબ્લેમ નથી પણ આ તો એવું છે ને કે અગર જો તે ફરી મળી શકે એમ હોય તો તેને મેળવવા એકવાર પ્રયત્ન તો કરવો જોઇએ.)

– વર્ડપ્રેસ.કોમ દ્વારા મારી એક નાનકડી વિનંતીને માન આપીને બધા જુના સબસ્ક્રાઇબરને અહી ટ્રાન્સફર કરી આપવામાં આવ્યા છે. ઇમેલ એડ્રેસ એક સેકંડ માટે પણ બંધ ન રહ્યું તેનો આનંદ થયો. (એક નવાઇની વાત- ડોમેઇન/ઇમેલ એડ્રેસ નવા રજીસ્ટ્રાર પાસે ટ્રાન્સફર થઇ ગયું હોવા છતાં મને વર્ડપ્રેસના સર્વર ઉપરથી પણ ઇમેલ ફોરવર્ડ ચાલું છે!)

– ‘TEST POST’ પછી ધ્યાનમાં આવ્યું કે ફીડ-રીડર માં નવી પોસ્ટ દેખાતી નથી, એટલે તે વિશે આગામી દિવસોમાં ચોક્કસ કંઇક સંશોધન કરવામાં આવશે. (એક શોર્ટ ઉકેલ છે: subscribe this feed: http://feeds.feedburner.com/marobagicho/feed)

– હમણાં આ ટેકનોલોજીને સમજવામાં ઘણો સમય જઇ રહ્યો છે. થોડા સુધારા-વધારા અને અખતરા કરવામાં આવ્યા છે એટલે થીમ, બ્લૉગ, પ્લગઇન, સોફ્ટવેર અને સર્વર વિશે થોડીઘણી સમજણ આવી ગઇ છે. એમ તો શીખવાનું હજુ ચાલુ જ છે. (શીખવાની આ પ્રક્રિયા તો જીંદગીભર ચાલતી જ રહેશે.)

– બ્લૉગ ટ્રાન્સફર વિશે લખવા જેવું તો ઘણું છે પણ હમણાં મારી નવી ગાડીની ડીલીવરી લેવાની છે અને તે પહેલાં બે-ત્રણ જરૂરી કામ પણ પતાવવાના છે એટલે હવે જવું પડશે. તે અંગેની વધુ માહિતી અને રોજબરોજની કાયમી અપડેટ્સ જલ્દી જ મુકવામાં આવશે. (તૈયાર રહેજો!)