ફેબ્રુઆરી’13 : અપડેટ્સ

. . .

– થોડા દિવસોમાં દુનિયા જાણે ઘણી સ્પીડમાં આગળ નીકળી ગઇ હોય એમ લાગે છે. હજુ જે લગ્નોની અમે વાટ^ જોતા હતા તે બધા ધડાધડ પુરા પણ થઇ ગયા અને બધા પોતાના ઠેકાણે ગોઠવાઇ પણ ગયા! (મસ્તીના દિવસો આમેય જલ્દી નીકળતા હોય એમ જ લાગે.)

– વર્ડપ્રેસની અપડેટેડ આઇફોન એપ્લીકેશનમાં હવે દરેક પ્રકારના નોટીફિકેશન જોઇ શકાય છે તે ઘણું ગમ્યું. (થેન્કયુ વર્ડપ્રેસ!)

– ટેણીયાને અને તેની મમ્મીએ અઠવાડીયા પહેલા ઘરે શાનદાર એન્ટ્રી લઇ લીધી છે. અને મારી એકલતાની મજાનું સુખ અને વિરહનું દુઃખ દુર થયું છે. (એમ તો હું દુઃખી કરતાં ખુશ વધારે છું.)

– વ્રજને સાત દિવસ પહેલા છ મહિના પુરા થયા. સાહેબની ધમાલ અને જીદ હવે થોડી દેખાઇ રહી છે. હવે તો તેના નીચેના બે દાંત પણ બહાર આવી ગયા છે અને ઉપરના દાંત આવવા માટે ઉતાવળા થઇ રહ્યા છે. (બાપ રે.. તેના દાંત સખત ધારદાર છે! – મને તો અનુભવ થયેલો છે પણ જેને શંકા હોય એ આવીને જાત-અનુભવ કરી જાય.)

– આ વખતે તેનો નવો અપડેટેડ ફોટો મારા બગીચામાં જ મુકવાનો પ્લાન છે. અમને ન બતાવ્યો એવી કોઇ ફરિયાદ તો ન કરે. (એમ તો હજુ કોઇએ આવી ફરિયાદ કરી નથી.)

– બે દિવસથી વ્રજની તબિયત થોડી લથડી છે. (સ્પેશીયલ અપડેટ: આ તેની પહેલી બીમારી છે!!^^) આમ તો વધારે કંઇ નથી થયું પણ થોડી શરદી-ઉઘરસ છે. બોલો, તો પણ ડોક્ટરે બે-ત્રણ (નાની-નાની) બોટલ અને થોડી ટેબ્લેટ્સ અમારા હાથમાં પકડાવીને તેને સમયસર વ્રજના પેટમાં પધરાવતા રહેવાનો હુકમ કર્યો છે. (મારો સીધો-સાદો-મીઠો-મધુરો-માસુમ ટેણીયો આજે ડૉક્ટરના નજરે આવી ગયો લાગે છે.)

– બિઝનેસમાં ગયા વર્ષે ઘણાં સુધારા-વધારા કર્યા હતા અને આ વર્ષે પણ કંઇક વધુ મોટા બદલાવ કરવાનો પ્લાન બની રહ્યો છે. (હજુ તો વિચાર કર્યો છે.) જો કે આ વખતના સુધારાઓ કંઇક વધારે મોટા હોઇ શકે છે. (થોડી સમસ્યા થશે પણ મજા આવશે. ફરી કંઇક નવું કરવા મળશે.)

– આજે ખબર પડી કે મેં છેલ્લે થીયેટરમાં જોયેલી ફિલ્મને છ મહિનાથી વધુનો સમય થઇ ગયો છે. (એક સમય હતો જયારે થિયેટરમાં એકપણ ફિલ્મ ‘મિસ’ ન થતી અને હવે તો લેપટોપમાં પણ ટુકડે-ટુકડે માંડ જોવાય છે. જાને કહાં ગયે વો દિન…)

– વેલેન્ટાઇન-ડે અને મેડમનો બર્થ-ડે હમણાં જ ગયો. હંમેશની જેમ વેલેન્ટાઇન-ડે ને ટાળવામાં આવ્યો અને બર્થ-ડે માં માત્ર કેક કાપીને ઘરમેળે જ પ્રોગ્રામ પતાવ્યો. (નોંધ: ‘સસ્તામાં પતાવ્યું’ – એવી કૉમેન્ટ ન કરવી.)

– સર્વેજનો નોંધ લે- હમણાંથી ફેસબુકને અમે ભુલી ચુક્યા છીએ (હવે જો ફરી યાદ આવશે તો જ ફરી ત્યાં દેખાશું), ગુગલ+ માં ગમતું નથી (હજીયે સુની-સુની દુનિયા લાગે છે) અને ઓરકુટને હવે કોઇ પુછતું નથી (જમાનો બદલાઇ ગ્યો છે મારા દિકરા…) એટલે અમે ત્યાં ન મળીયે તો માફ કરજો. જો કે ટ્વીટર સાથે હજુ થોડો બોલચાલનો વ્યવહાર છે!

. .

^વાટ જોવી=રાહ જોવી

^^પહેલી બિમારીના નામે કોઇએ ‘પાર્ટી’ માંગવી નહી,
દોસ્ત.. બિમારીના કંઇ સેલિબ્રેશન ન હોય !

. . .

જાન્યુઆરી’13 : અપડેટ્સ-2

. . .

– નેધરલેન્ડથી આવેલા સજ્જને વિદાય લઇ લીધી છે અને હવે તેઓ તેમના ઠેકાણે પણ પહોંચી ગયા છે. (અમદાવાદની ‘વ્યવસ્થિત’ ટ્રાફિક-સેન્સ અને રસ્તા વચ્ચે ‘હકથી’ રખડતી ગાયો-કુતરાઓને જોયા બાદનો તેમનો ચહેરો જોવાનો લ્હાવો હવે નહી મળે!)

– ઠંડી આ વખતે જવાનું નામ જ નથી લેતી. (જો કે તેના કારણે આજકાલ બે સ્વેટર પહેરવાથી હું થોડો ‘ભર્યો-ભર્યો’ દેખાઉ છું!)

– ટેણીયો અને તેની મમ્મી દસ તારીખે ઘરે આવશે પણ તેમને લેવા બે દિવસ વહેલા જવાનું છે. (વ્યવહાર છે ભાઇ.. આ વખતે તો સાચવવો જ પડશે.)

– દિલ્લીગેંગરેપ કેસના એક ‘ખાસ’ આરોપીને સગીર ગણીને છોડી દેવાશે !! (બોલો.. અંધાકાનુન જીંદાબાદ!!)

– વચ્ચે બગીચામાં બદલાવના ચક્કરમાં ઉત્તરાયણની અને તેની આસપાસની અપડેટ ચુકી જવાઇ અને હવે તો હું પણ ભુલી ગ્યો કે મેં ત્યારે શું કર્યું હતું!! (ગુજરાતી ભાષાની સિસ્ટમ પ્રમાણે આ એક ‘શું’ ની જગ્યાએ ‘શું-શું’ આવે; પણ એમ લખું અને તમે મારી મજાક ઉડાવો તો…? એટલે ચેતીને ‘એક’માં જ પતાવ્યું છે. 😉 )

– થોડા સમયમાં ઘણાં લગ્નો ‘પતાવ્યા’. હજુયે બે લગ્નો બાકી છે અને બંને મારું ‘તેલ’ કાઢી નાખશે એ ચોક્કસ છે. (હે પબ્લીકના પરવરદીગાર, ઠંડી થોડી ઓછી કરોને યાર…તો લગ્નમાં વહેલા ઉઠવું થોડું સરળ બને.)

– પાછળના દિવસોમાં એક ‘ચીટર’ સજ્જને મને ફરી એકવાર શીખવ્યું કે; “દરેક માણસ પ્રામાણિક નથી હોતા અને અજાણ્યા ઉપર ભરોષો મુકતા પહેલા સો વખત વિચારવું જોઇએ.” (પરંતુ મારી સમસ્યા એ છે કે ભરોષો મુકતી વખતે હું ૧૦૧ થી જ વિચારવાનું શરૂ કરું છું !! હશે… મારા નસીબમાં જ છેતરાતા રહેવાનું લખ્યું હશે…)

# હવે એક ખાનગી વાત: (મને પર્સનલી ઓળખતા લોકો ન વાંચે તો સારું)
– આવનારાં દિવસોમાં એક એવા પણ લગ્ન છે જેમાં ‘પરણનારી’ મારી જુની XXXXX છે અને તેના તરફથી મને લગ્નમાં આવવાનું ખાસ આમંત્રણ છે પણ હું નથી જવાનો.
– કારણ: અમે અલગ થયા તે ઘટના પાછળ તેના ‘સુંદર’ કરતુત અને તે પ્રત્યે મારી સખત નારાજગી હતી. મારા જીવનનો આ એક એવો સંબંધ છે જેનો અંત મે એકઝાટકે કર્યો હતો અને તેના પછી કયારેય પાછળ ફરીને જોયું નહોતુ. ત્યારથી અમારો સંબંધ એકબીજા સાથે નામમાત્રનો પણ રહ્યો નથી અને આજે હવે તેનું આ આમંત્રણ સ્વીકારીને તે ભુલાયેલા સંબંધને ફરી શરૂ કરવાનો મારો કોઇ ઇરાદો નથી.

. . .

ડિસેમ્બર’12 : અપડેટ્સ

. . .

– દરરોજ કંઇકને કંઇક નોંધ લેવા લાયક બનતું જ રહેતું હોય છે પણ કમનસીબે સમયસર નોંધવાની આળસમાં ઘણું ભુલી જવાતું હોય છે.

– ઠંડી અત્યારે થોડી-થોડી વધી રહી છે પણ વર્ડપ્રેસની અસીમ કૃપાથી મારા આ બગીચામાં તો હમણાંથી જ બરફવર્ષા ચાલુ થઇ ગઇ છે !! (તમે જોયું કે નહી? જુઓ જુઓ…બેક્ગ્રાઉન્ડમાં બરફ વરસતો દેખાશે.)

– રવિવારે વ્રજને ફરી રસી અપાવવા લઇ ગયા હતા. હવે પછીનો ‘ડોઝ’ મે મહિનામાં આવશે. આ રસી આપનારા ડોકટર-નર્સ જે રીતે રસી-ઇન્જેકશન આપતા હોય છે તે જોઇને કુમળા બાળક પ્રત્યે તેઓ થોડા નિર્દય હોય એવું લાગે. (હશે, તેમની માટે તો આ બધુ રોજનું કામ કહેવાય એટલે..)

– પરિવારમાં લગ્ન પુરા થયા. હવે તો બધા મહેમાનો પોતપોતાના ઘરે પહોંચી ગયા છે અને પોતના કામધંધે પણ વળગી ગયા હશે. (પણ અમે હજુ રજાના માહોલમાંથી બહાર નથી આવ્યા બોલો…)

– આ મહિનાની ૧૩ અને ૧૭ તારીખે ગુજરાતમાં ચુટણી છે. સૌને પોતાનો કિમતી મત ‘યોગ્ય’ ઉમેદવારને આપવા વિનંતી. (જો યોગ્ય ઉમેદવાર પસંદ કરવો મુશ્કેલ હોય તો નાછુટકે ઉભેલા ઉમેદવાર માંથી પ્રમાણમાં ઓછા ‘નાલાયક’ની પસંદગી કરવી.) અને આપને કોઇ જ ઉમેદવાર યોગ્ય ન લાગે તો….

તમારૂં ઓળખપત્ર લઇને મતદાન કેન્દ્ર પર જજો.
તમે મતદાન કરવા આવ્યા છો તેની નોંધ રજીસ્ટરમાં કરાવજો.
પહેલી આંગળી પર કાળું ટપકું મુકાવજો.
EVM પર “ઉપરમાંથી કોઇ નહિ” નું બટન દબાવજો.

જો એવું બટન EVM પર ના હોય તો…
પ્રિસાયડીંગ ઓફિસરને કહો કે તમે ફોર્મ નં 16A દ્વારા જ મતદાન કરવા ઇચ્છો છો કારણકે તમે જે મત આપવા માંગો છો એ સુવિધા EVM પર નથી. (EVM = ઈલેક્ટ્રોનીક વોટીંગ મશીન) ફોર્મ 16A ભરી ને તમારા તથા પ્રિસાયડીંગ ઓફિસર ના હસ્તાક્ષર કરવા જરૂરી છે. આ ફોર્મ ભરવાથી તમારો ” કોઇ ઉમેદવાર ચૂંટવા લાયક નથી ” એવો મત નોંધાઇ જશે તેમજ તે મુજબની ગણતરીમાં લેવાશે.
આ અંગે વધુ જાણકારી / માર્ગદર્શન તમે સ્થાનિક ચૂંટણી નિરીક્ષક પાસેથી વિના સંકોચ અધિકાર સાથે મેળવી જ શકો છો.
(માહિતી સ્ત્રોત: શ્રી અખિલ સુતરીયા)

– અમારે ત્યાં ઉભેલા ઉમેદવારમાં જે ઉમેદવાર ઠીક લાગે છે તેની પાછળ રહેલી રજકીય પાર્ટી ઉપર મને ભરોસો નથી આવતો અને જે ઉમેદવાર પસંદગીને ‘લાયક’ નથી તેનો રાજકીય પક્ષ (અન્ય વિકલ્પના અભાવે) મને પસંદ છે. આ કારણોથી મારો કીમતી મત કોને આપવો તે હજુ સુધી નક્કી કરી શક્યો નથી. (નક્કી કરીશ તો પણ અહીયા કોઇને નહી કહું. એ તો સિક્રેટ જ રહેશે. 🙂 )

– મારા મતે આ વર્ષે પણ નરેન્દ્ર મોદીનું પલ્લું થોડું ભારે જણાય છે. હવે જોઇએ ગુજરાતની પ્રજા આખરે કોને વધુ પસંદ કરે છે. (જો કે હું કોઇ ચુટણી એક્સપર્ટ નથી એટલે મારી ધારણા ખોટી પણ પડી શકે છે જેની નોંધ લેવી.)

– અમદાવાદના આકાશમાં હમણાંથી પતંગ દેખાવાના શરૂ થઇ ગયા છે. આ વર્ષે ઉતરાયણની આગળના દિવસે એટલે કે ૧૩ જાન્યુઆરીના દિવસે રવિવાર આવે છે એટલે આ વખતે ત્રણ દિવસની ઉતરાયણ પાક્કી. (મને બચપનથી જ ઉતરાયણનો તહેવાર ઘણો વ્હાલો.) ગુજરાત સરકારના આગામી કાર્યક્રમોમાં તપાસ કરીને કોઇ મને કહેજોને કે આ વખતે ‘વાઇબ્રન્ટ ઉતરાયણ’ના આયોજનનો કોઇ પ્લાન છે કે નહી?

– રેગ્યુલર દોડવાનો પ્લાન પહેલા લગ્નના કારણે અને હવે ઠંડી (સાથે સાથે થોડી આળસ) ના કારણે અટકેલો છે. (આ અટકેલો પ્રોગ્રામ ફરી શરૂ કરવું ઘણું વિકટ લાગે છે…. કેમ કે હમણાંથી સવારે વહેલા ઉઠાતુ જ નથી.)

– મારી ગાડીના કાચ ઉપરની બ્લેક ફિલ્મ ન કાઢવા બદલ ગઇકાલે જ દંડ ભર્યો! (હવે તો જલ્દી જ કાઢી નાખવી પડશે. 🙁 )

– બસ, હવે વધારે લખીને લાંબુ નથી કરતો. અસ્તુ.

. . .